18 OCTOBER 2015(SUN)
離開左咖啡灣之後(按此重溫),我地就轉戰三聖,因為去食海鮮大餐,同豬仔舅父慶生日呀~
印象中我都好似係第二次嚟三聖灣食海鮮,對上一次都只係NNN年前入一間大大地又靚靚地嘅酒樓食,當然嗰次印象都真係麻麻。
冇嚟咁耐,原來依家都已經唔同晒,感覺有啲似西貢海鮮街~
豬仔舅父帶路我地搵左間小店搵左位之後,我地就去海鮮街買海鮮。睇住啲海鮮係面前,又可以自己揀,感覺啲海鮮都特別生猛呀~
揀好晒就去磅重俾錢~
我地嘅一大袋戰利品就帶去小店幫我地煮啦~
今次我地就係去依間食啦~
由於有小狗同行,所以我地坐出面嘅位置,依個天氣涼涼地坐外面都唔錯呀~
我地豐富嘅晚餐出動啦,首先就係豉椒炒聖子~
清蒸鮑魚仔~
蒜蓉粉絲蒸扇貝~
椒鹽瀨尿蝦~
鹽焗蟹~
五樣海鮮除左個聖子比較失色之外,其他都唔錯,尤其個瀨尿蝦,好重味之餘又好厚膏,真係好回味呀!
除左海鮮之外,我地都有叫啲小菜,冇法啦...小小豬唔食得海鮮,都要叫啲其他照顧下佢嘛!
先嚟泰式鳳爪~
蝦醬炒飯~
蕃茄炒油麥菜,依個配搭都係第一次食,估唔到又幾好食,等我都偷師學煮先~
秘制豬扒,依個餸可以話係全晚最多讚嘅一個,因為個醬汁好好味之餘,豬扒又好淋身,大家都叫我學煮依個餸添呀~
開開心心又過左一晚,原來三聖灣食海鮮都唔錯,價錢比西貢嗰啲平少少,又好味啲啲,所以下次去食海鮮我地又多個選擇了!
**我地嘅FACEBOOK FAGE,唔知大家LIKE左未呢?**
小小豬的成長日誌
大家一齊嚟交流下煮飯仔及去玩嘅親子樂啦!
沒有留言:
發佈留言