新春內地之旅 PART 4 - 海洋王國

20 FEBRUARY 2015(FRI)

終於嚟到我地今次旅行最重要嘅一個目的地，就係去海洋王國玩啦！

我地齊齊帶住未瞓醒嘅狀況出發啦~

我地又搭左一程長長途旅遊巴之後，終於到左目的地啦~

等領隊為我地準備門票之後，就可以入場啦~

我地嘅海洋王國之旅就由行過個勁靚嘅LCD長廊開始~

不過可能今日係年初二關係，人流真係多得好驚嚇，好唔容易先去到我地第一個目的地，就係近臨離睇海豚~

我地有幾近距離，就係啲海豚彈跳時啲水花彈到我地濕晒就知。不過又可以咁近見到海豚表演，濕少少都可以接受啦~

之後我地行過去海豚劇場，見時間剛剛好，所以就去睇表演啦！估唔到一次過可以見到十幾條海豚表演，海豚真係好叻，每一個項目都做得到指示，我同小小豬都睇得眼定定呀~

睇完海豚表演行返出去時，見到勁多人同埋好多封路，原來係做緊巡遊。我地都迫唔到前排睇，所以遠處望望啦~

跟住我地就排隊入去鯨鯊館睇魚仔，真係超級多人，我地要排左大約半個鐘先可以入場呀~

入面個又真係幾大哦~

睇依張相就知點解我地排咁耐，因為真係好多人呀。不過啲魚又真係好多，都幾靚呀~

哈哈哈...好在我地都搵到個靚位，小小豬都可以睇到魚仔~

行完鯨鯊館之後，我地就行返出去樂園外面，因為我地要去睇大馬戲呀~

由於場內係唔可以拍攝，所以我都好乖乖咁做一位專心嘅觀眾。不過依個馬戲表演真令我有啲失望，除左魔術部分我覺得幾好睇之外，其他表演部分都比較悶場，加上場內嘅音響都唔係咁好，所以睇完個SHOW都有少少頭痛呀！

睇完SHOW之後，我地又返入樂園玩。我地係樂園入面簡單食左晚餐之後，我地去睇企鵝呀~

雖然依度嘅企鵝數量一定唔夠香港多，不過總係覺得整個環境唔夠海洋公園嘅好，依一刻真係有啲掛住我地嘅海洋公園呀！

今日我地最後睇嘅就係北極熊館~

哈哈哈...總係覺得啲北極熊黑卒卒的，冇電視睇嘅咁靚呀！

最後我地去睇煙花幻彩表演，由於我地晏左去睇，所以唔可以係有利位置，原本大水池都有表演，不過我地睇唔到，只可以睇煙花表演嗰一部分~

睇完煙花表演，我地今日嘅行程就完結了。其實整個海洋王國都真係好大，我地有好多地方都未有時間行到，不過唔知點解總係覺得依個海洋王國就係我地嘅海洋公園同迪士尼嘅混合版。

坦白講對海洋王國嘅印象都唔係咁深(又或今日人真係勁多人，所以冇心機了解啦)，對我嚟講，始終都係鐘意我地香港嘅迪士尼同海洋公園多啲呀！

《續待》