第一次參觀小學

15 FEBRUARY 2015(SUN)

今日大肥豬又為我地準備左一個特別節目, 就係去參觀大肥豬夢寐以求嘅小學呀~

哈哈哈...其實我地之前都嚟過依間學校一次, 就係去萃男書院葉傑全音樂廳, 去聽虎豹夏日音樂節匯演(按此重溫)呀!

因為上次我地係路經小學部去搵個音樂廳, 所以都只係行過, 未有仔細去睇, 終於可以趁今日依個好機會, 俾大肥豬入去了解一轉啦!

一向小小豬嘅學習安排都係由大肥豬負責, 所以我都好少理佢會點安排, 因為我信得過佢係會為小小豬作最適合嘅. 下半年就要選擇小一, 所以大肥豬依家都開始要做少少準備, 成日都去睇啲討論區, 我成日見佢一有時間就去睇, 真係做齊功課呀!

難得依間名小學有開放日, 所以我地就嚟參觀一下啦~

第一個參觀地方就係電腦室~

玩左一陣之後就去小一課室參觀, 小小豬都好認真睇哥哥嘅矩品呀~

之後就去參觀其他課室玩遊戲, 其實都有好多唔同種類嘅學算性遊戲, 不過大都比較多, 所以我地都玩唔晒, 只係玩左好幾樣呀!

有寫羊仔心意咭, 負責哥哥好細心, 慢慢同小小豬解釋啲字詞, 仲教佢應該點寫添~

之後就去數學室玩啲同數學有關嘅遊戲~

仲有去做個小魔術遊戲~

我地仲有去宗教室玩金句砌圖同做襟章~

即場仲有非洲鼓教學, 小小豬打得幾投入~

最後我地就去參觀圖書館, 一入到去小小豬就已經好興奮啦~

搵本圖書慢慢睇先, 唔覺唔覺原來我地係圖書館逗留左差唔多一個鐘, 小小豬鐘意睇書都係一件好事嚟呀~

原來圖書館入面都有小遊戲, 我地當然又排隊玩一陣啦~

一間小學估唔到我地係入面都可以逗留左差唔多四個鐘, 不過參觀完小學之後, 大肥豬就更加鐘意依間小學, 佢話學校環境同設施都好好, 啲學生又有禮貌, 仲話小小豬玩得好開心, 應該好鐘意依間學校哦!

所以如冇意外, 我地都會帶小小豬嚟試一試! 老實講, 到時都一定會有勁勁勁多人嚟考, 小小豬都唔知可唔可以順利咁面試, 都應該考入機會微乎其微, 不過試一試都冇壞, 就當係俾小小豬一個挑戰, 入唔入到都唔係重要(依個只係我個人認為....大肥豬當然係非常想小小豬可以考入到啦), 最重要都係小小豬係可以乖乖咁完成個面試呀!