試食：包點先生賀年糕點

4 FEBRUARY 2015(WED)

仲有兩個星期左右就到新年, 唔知大家準備好新年物品未呢? 新年當然係唔少得各式各樣嘅美味糕糕啦!

正當我仲頭痛緊買啲咩糕嘅時侯, 就收到包點先生試食邀請, 仲好豐富地送左四款唔同口味嘅賀年糕點俾我, 真係非常謝呀~

其實包點先生我想大家都唔會陌生, 我同小小豬都好鐘意食佢地嘅中式包點, 有時等車時食住個熱騰騰嘅包包, 都真係唔錯呀!

不過, 我自己就之前就未有機會試佢地嘅賀年糕點, 正好等依次機會一次過試晒四款(包括椰汁年糕、臘味蘿蔔糕、富貴芋頭糕、如意馬蹄糕)啦!

包點先生所推出的四款糕點全部以新鮮食材在香港廠房人手製造, 而且廠房更通過業界權威的 ISO20002:2005 及 HACCP 系統管理認證。過程更不添加任何防腐劑, 真係可以話食得安心又放心呀~

哈哈哈...依四款糕點就成為左我兩口子嘅宵夜啦!

首先就試食我至愛嘅椰汁年糕啦~

依款椰汁年糕入口煙煙韌韌又唔太甜, 食落會感受到好香嘅椰汁味, 味道都唔錯呀~

接下來亦都係我鐘意食嘅如意馬蹄糕~

馬蹄糕都好爽口彈牙, 加上食落時都有啖啖嘅馬蹄肉好爽, 所以我幾啱我味呀~

之後就到大肥豬至愛嘅蘿蔔糕~

肥豬豬話個味道唔錯, 好有蘿蔔味, 唯獨投訢我煎得唔夠香口, 影響佢個口感, 真係俾佢激C呀~

最後一款就係我同大肥豬都覺得最有驚喜嘅富貴芋頭糕~

係煎嘅時候就已經聞到好香嘅芋頭味, 而且芋頭糕嘅質地唔會太軟或太硬, 食嘅時候又可以食到粒粒芋頭, 口感同味道真係好夾~

其實四款賀年糕點味道都唔錯, 如果大家仲未諗到新年食咩糕點, 包點先生真係一個唔錯選擇呀!

More Information :
Facebook：https://www.facebook.com/baodimsinseng?fref=ts