PEACE BOX 祝福大行動

26 FEBRUARY 2015(THU)

好難得小小豬一本正經拎住個禮物盒, 其實佢係做啲咩呢~

其實小小豬係做緊一件有意義嘅事, 就係參加屋苑管理公司舉辦嘅PEACE BOX祝福大行動啦~

其實上年依個時候我地都有留意屋苑有依個祝福大行動, 不過上年我地遲左, 拎唔到禮物盒, 所以唔可以參加.

今年一見到就大堂出左通告, 就即刻問管理員叔叔拎個禮物盒啦~

有禮物盒在手, 返到屋企小小豬就即刻為依件有意義嘅事做好準備啦~

其實依個活動係由康業服務有限公司連同香港中華基督教青年會聯合主辦, 透過收集小禮物, 將關愛送給一些基層家庭或患病小朋友, 等佢地感受人間有情及互助關懷的幸福~

雖然係送贈小禮物, 不過都有啲指引, 當然最好就係全新或是未拆封啦~

同小小豬講解一陣之後, 佢都明白左今次活動嘅意義, 所以佢就準備將啲小禮物放入禮物盒啦~

首先小小豬就準備左幾本圖書, 依幾本圖書係PN班時用過嘅書本, 原本我都唔建議小小豬送埋出去, 不過小小豬好堅持, 佢仲話小朋友都係好鐘意睇圖書呀! 見佢咁堅持, 所以我地跟隨佢意思啦~

之後就揀左幾支顏色筆~

仲拎左一包果汁糖添~

仲有拎左啲我之前開格仔店賣剩嘅錢包仔~

轉眼間禮物盒就已經滿滿啦~

最後小小豬就負責寫埋個心意部分~

小小豬就可以將依個充滿愛心嘅禮物盒交去管理處, 等佢地轉交俾負責機構啦~

雖然我地都唔係送贈左好多嘢, 只係出左少少一份綿力, 不過希望值依個活動, 等小小豬明白到施比受更為有福, 同時亦希望收到禮物嘅小朋友可以得到快樂!

如果大家都係康業服務有限公司管理嘅屋苑, 或者屋企附近有佢地管理嘅商場, 咁就快啲去管理處問職員拎個禮物盒, 齊參加依個有意義活動啦!

 

錦田鄉村俱樂部

22 FEBRUARY 2015(SUN)

話說我地尋日先返到嚟香港，原本都打算今日留係屋企休息下。點知我地今日又突如其來有節目，所以又可以去玩啦~

其實係因為今日奶奶要入新界拜年，大肥豬為免奶奶迫巴士入新界，所以就車奶奶入去拜年。

由於我地今年唔方便拜年，所以就車左奶奶去目的地之後，就係附近行下等奶奶。

行行下就見到一個好玩嘅地方，就可以入去玩一轉啦~

小小豬話要睇下個地圖有咩玩哦~

其實睇咩呢，入嚟當然係第一時間去摘士多啤梨啦！依個貪玩小小豬一入到個士多啤梨場都不知幾興奮呀~

好專心地搵緊又大又紅嘅士多啤梨呀~

搵到目標就努力剪剪剪~

成功摘左第一粒，睇下個傻仔幾高興~

之後就繼續搵...繼續摘~

唔覺唔覺都俾小小豬摘左半籃，好在粒粒都係紅卜卜，成績都唔錯啦~

摘完士多啤梨之後，見旁邊有個蕃茄場，我地就入去摘蕃茄啦~

蕃茄比士多啤梨難摘啲，因為個莖比較粗，所以要好大力先可以剪到呀！小小豬用上九牛二虎之力，終於摘到粒啦~

之後我地就排隊去俾錢，估唔到二十粒士多啤梨再加上兩粒蕃茄，咁就要六十幾蚊，真係覺得有啲貴呀。不過入得嚟都預左，加上又睇住小小豬細心搵、專心摘同埋收成個開心樣，都係值得的~

除左依兩款蔬果之外，旁邊有另一個農莊有蘿蔔拔呀。雖然拔一條要$20，不過見小小豬又非常想拔，所以就俾佢試下啦！

拔蘿蔔同摘士多啤梨好唔同，小小豬嘅力氣都唔夠，所以都係要大肥豬幫佢一把先可以拔到呀~

睇下佢拔完蘿蔔個神氣樣，好似充滿自信咁哦~

係依個農場其實仲有啲好靚嘅菜，原本小小豬都話好想摘。不過由於農夫叔叔話未合時，所以小小豬唯有帶住依依不捨心情離開啦~

之後當我地行過兒童玩樂地方時，小小豬見到依個機械車仔話好想渣車車，一睇個價錢($40渣一圈)，即刻希望轉移小小豬視線啦！

最後一個慈父忍唔住見到個乖仔望住動物車個失望樣，當然就帶依隻豬仔去排隊買飛玩車啦~

雖然話有少少肉痛，不過見小小豬係動物車上享受嘅樣，都OK啦，當係一年一次嘅活動啦~

奶奶拜完年之後我地就要去接返奶奶，所以我地係錦田鄉村俱樂部都只係玩左大約兩個鐘，雖然都有少少玩得唔夠喉，不過小小豬今日都做左小農夫(摘左三款蔬果)，又渣左轉貴車，仲唔係一次過滿足四個願望啦！