失驚無神遊機場

28 DECEMBER 2015(MON)

聖誕假當然要去玩，難得DADDY放假陪我地，原本打算渣車入新界地區感受一下大自然，點知小小豬一句：『不如我地入機場呀？我搭機鐵係免費呀』。就係佢依一句.....我地就失驚無神遊機場~

其實如果唔係小小豬講，我都唔知有依個優惠，一問之下原來佢每日搭地鐵時放學見到張海報，所以就知道。 估唔到小小豬唔聲唔聲都有留意啲身邊事物(當然亦都因為小小豬係火車控關係，佢特別留意啦)，既然小小豬咁叻仔有留意到，所以我地就滿足一下佢，帶佢去搭機鐵遊機場啦~

之前我地渣車入機場都唔洗一個鐘，不過一搭機鐵就要多半個鐘，老實講....有得選擇都唔咁揀，不過見小小豬咁歡喜，所以都算啦~

一落到機鐵小小豬就一支箭咁去扮行李，因為企係手推車上唔洗行嘛...真係你都冇佢咁精呀~

我地主要都係去T2行街街，見到聖誕樹緊係影下啦，等我扮下去旅行都好呀~

原來T2開左一間好大嘅吉吉島12蚊店~

有得行街就緊係要去八卦一番啦~

之後我地就去航空探知館，其實主要都係去SKY DECK睇飛機~

其實今次都係小小豬第二次嚟，佢上次一嚟到就已經好開心，睇左好耐飛機先肯走(按此重溫)。

今次再嚟緊係興奮啦~

其實唔止小小豬，我都覺得好舒服，因為個VIEW真係勁正呀~

睇住飛機係我地頭上飛過，真係好想我係飛機上，好想去旅行呀.....幾時可以到我呀~

小小豬話要靜靜地坐係石壆睇飛機升降哦~

靜靜之後，當然又嚟周圍走啦~

嘩...仲乜依兩父子咁SWEET呀，真係當我唔在場呀~

唔覺唔覺我地又坐左差唔多兩個鐘，之後又再繼續小小豬扮行李推車仔係T2同T1周圍行啦~

坦白講...初時我對依個失驚無神遊機場都有丁點抗拒，不過見小小豬又咁ENJOY，所以...都係嗰句老土說話：只要小小豬開心，陪佢去邊都一樣咁開心。同埋好地方去幾多次都冇所謂啦(不過....下次可唔可以渣車入嚟，因為搭機鐵真係用多好多時間呀)！

 

 

**我地嘅FACEBOOK FAGE，唔知大家LIKE左未呢？**
小小豬的成長日誌
大家一齊嚟交流下煮飯仔及去玩嘅親子樂啦！

 

試用：Wild Carrot Herbals 面部護理

26 DECEMBER 2015(SAT)

早前有機會試用Wild Carrot Herbals 琉璃苣敏感系列(按此重溫)，今次又可以試多佢地兩件皇牌產品，又可以借機扮下靚啦~

琉璃苣籽油紅石榴精華素~

早前試用琉璃苣敏感系列時，都感受過琉璃苣籽油嘅功效，今次所試用嘅琉璃苣籽油紅石榴精華素除左有琉璃苣籽油之外，仲加埋石榴籽油，所以對抗菌消炎及促進細胞再生更有效用，持續使用肌膚可以回復彈性，並能趕走暗啞。

質感都比一般精華素輕物，但係非常易推，而且仲好快就吸收，仲唔會感到好油膩之餘仲覺得好滋潤呀~

每日早晚用完爽膚水之後，就吱幾下嚟按摩全面呀~

用左一段時間，感覺效果都唔錯，用落都覺得好潤之餘又唔會笠痴痴，而且仲好有光澤感添呀！

野生玫瑰眼霜~

依個可以話係Wild Carrot Herbal嘅皇牌，而且仲大獲好平添。可以有效延緩老化情況，有效淡化細紋及魚尾紋 修護眼周脆弱肌膚。

質地都較為杰身，但非常容易推開至眼周肌膚~

每日早晚輕輕手由外至內打圈塗抹按摩~

係我使用依一段時間內，我完全冇任何不適或敏感情形出現，而且仲覺得眼睛周圍都好水潤充滿光澤感。

 

More Information :
Website：http://gardenorganicshk.com/tc/index.php
Facebook：https://www.facebook.com/Garden-Organics-312299542266272/

 

**我地嘅FACEBOOK FAGE，唔知大家LIKE左未呢？**
小小豬的成長日誌
大家一齊嚟交流下煮飯仔及去玩嘅親子樂啦！

 

樂在棋中桌上遊戲展@饒宗頤文化館

25 DECEMBER 2015(FRI)

早前去參加樂在棋中試玩活動時(按此重溫)，知道佢地係饒宗頤文化館會有一個桌上遊戲展覽，除左睇展之餘又有得姐姐教玩棋。

小小豬一向都係佢地嘅粉絲嚟，所以就帶佢去玩一轉啦~

饒宗頤文化館我都係第一次嚟，整體上個氣氛都係好清幽，係入面行一轉都真係人都文青啲呀~

係依個咁靚嘅環境下，其實都勁想影多啲靚相，不過心急去玩棋嘅小小豬呈現出一臉不願意拍照樣，我都知佢心急去玩，所以就直接去樂在棋中嗰個展覽室啦~

今次展覽係展出樂在棋中所有推出過桌上遊戲，其實大部分小小豬都已經推有，仲玩到滾瓜爛熟，所以當小小豬一入到展覽室就已經極度興奮，不停係度講依個遊戲係點玩，嗰個遊戲又應該點先嬴，總之就係度自我陶醉啦~

原來樂在棋中都推出不少桌上遊戲，佢地所推出嘅遊戲真係由4-99歲都啱玩，其中仲有一個係專為"老友記"已設，總之佢地宗旨都係創造優質親子時間，提升彼此關係~

當然只係參觀小小豬又點夠喉呀，佢仲去左試玩區同姐姐玩最新推出嘅《張保仔傳說2》添~

依隻豬仔玩完又玩，玩完一樣又一樣，每玩一個遊戲姐姐都好耐心咁教佢玩，係辛苦晒姐姐陪佢玩呀~

係參觀嘅同時又可以玩下簡單問答遊戲，之後就可以去玩扭蛋機，嬴取小禮物呀~

估唔到一個地方就可以輕輕鬆鬆消磨左一個下午，當然亦都係因為小小豬玩桌上遊戲玩到唔願走啦。亦都因為小小豬掛住玩，所以我地都未參觀晒整個饒宗頤文化館就要離開了。

不過依度環境咁舒服，而樂在棋中依個展覽展期係三個月展覽所以搵機會可以再嚟行過，等小小豬又可以嚟下棋之餘，到時一定要捉小小豬陪我影返轉靚相先得。

場地會有免費穿梭車來往美孚地鐡站，所以都係好方便呀~

提一提大家青年導師只會係星期六、日及公眾假期在場同大家玩遊戲，所以如果大家有興趣同小朋友去玩一轉，咁就要留意啦！

 

More Information :
Website：http://www.pob.hk/
Facebook：https://www.facebook.com/pobhk?fref=pb&hc_location=profile_browser

 

**我地嘅FACEBOOK FAGE，唔知大家LIKE左未呢？**
小小豬的成長日誌
大家一齊嚟交流下煮飯仔及去玩嘅親子樂啦