HAPPY BATHING TIME

28 FEBRUARY 2013(THU)

今日係我同小小豬洗白白嘅時候，LULU妹拎左一樣玩具出嚟，就係LULU好一位朋友仔送俾小小豬嘅水槍。

見小小豬玩得咁興奮，所以同佢影返輯開心出浴照啦(大家放心...我一定會緊守第三點，以免小小豬大個時怪責我呀...哈哈哈)~

之前都未玩過水槍，好有興趣究竟咁哦~

不過因為天氣都仲係凍凍地，所以都只係俾小小豬玩左一陣，等遲多少少熱天嘅時候，到時可以俾小小豬玩耐啲，又可以教吓佢點玩，等第日去沙灘玩時都可以帶埋去玩都幾好呀！

**我的微博..關注吧**

古靈精怪為食仔

27 FEBRUARY 2013(WED)

今日都小豬媽為依個為食嘅小小豬準備左一個好豐富嘅飯後果。

一戴上口水肩小小豬已經既心急又興趣啦~

嘩...一見到碟又大又靚嘅士多啤梨&桑子，就即刻要搶住拎啦~

開始時都食得好斯文~

不過....好快就變成狼吞虎嚥啦，但小小豬個為食樣又真係幾古靈精怪呀~

食到單晒眼咁...哈哈哈~

基本上依一碟生果我地都只係食左幾粒士多啤梨，大大話話小小豬自己都食左一大半(不過小小豬對桑子又不太有興趣，都只係食左幾粒)，小小豬真係一個士多啤梨怪嚟呀！

**我的微博..關注吧**

開心仔仔

26 FEBRUARY 2013(TUE)

早排小小豬放學之後，都會要求去學校附近個公園仔玩。之後我都會俾佢玩幾次先走，不過自從有一日老師話佢上堂又嚟攪事時，所以我就懲罰佢，冇再俾佢去玩。當然每日小小豬如常扭扭計咁要求，我就同佢講因為佢返學唔乖，所以冇得玩！

餓左咁多日，小小豬今日終於可以有得去公園仔玩啦！

睇佢有得玩幾開心~

點解可以有得玩，就係因為老師讚小小豬有少少進步，上堂攪事情況就少左(只係少左....即係仲有攪事啦...真係激C人啦)。

見佢有乖左啲啲，所以就俾佢玩一陣，等佢知道做乖乖就可以有獎勵。

希望佢可以KEEP住越嚟越乖，係學校唔好再攪事啦！





**我的微博..關注吧**

好一隻爛玩豬

25 FEBRUARY 2013(MON)

今日都唔知發生乜事，依個小小豬由放學開始，情緒都高漲到頂點，成個下午都不停係度好開心咁唱歌跳舞，就連瞓覺時都係度唱歌，攪到一直都唔肯瞓，幾經辛苦，終於都俾我捉到佢瞓著左。

瞓醒就繼續攪事，仲大膽到走上小豬媽張床，明意上就係陪休息緊嘅小豬媽，實際就係鐘意係張床上面跳跳扎。

近期成日都整依個扮嘢樣....好醜樣呀...哈哈哈~

一瞓底就係LULU妹捉住左~

捉住個百厭仔仲乜...咪就係俾LULU妹"吱..吱"啦~

最後小豬媽仲加入戰場添~

三個都想到傻晒，仲以為小小豬瞓醒會平靜啲，瞓醒就仲有足夠能量係度繼續高漲，真係冇佢收。不過見佢玩得咁開心，真係會令人開心返晒呀！

**我的微博..關注吧**

奶奶生日

24 FEBRUARY 2013(SUN)

正月十五除左係元宵節之外，亦都係另一個節日，就係奶奶嘅生日。所以每一年元宵節嘅慶祝活動，就係同奶奶食晚飯慶祝啦！

今年當然唔例外，一家人同奶奶去酒樓食餐豐富嘅晚餐慶生日。由於奶奶唔食得蛋糕，少左切蛋糕依個環節，但壽包就一定唔可以少，所以我地就以壽包嚟慶祝。

睇吓依個為食小小豬，一見啲壽包幾咁興奮，成個急不及待嘅樣呀~

小小豬真係太愛啲壽包，就連我地影大合照時，佢都只係掛住拎個壽包，所以完完全全俾啲包包遮掩左呀~

今餐我地去左淘大稻香食，話時話依家稻香啲水準又真係好似好返啲，啲嘢食都算抵食又大碟，味道都算OK，價錢又唔貴，唯一美中不足就係啲職員服務就麻麻地，或者佢地真係太忙，所以要叫左佢地成四次先幫我拎張BB椅，後加碗白飯又係要叫好多次，最後啲餸都差唔多食晒，碗飯先到。如果可以改善埋依啲，咁就非常好啦！

就係咁，我地又開開心心過左一個晚上啦！

**我的微博..關注吧**

鰂魚涌海濱公園

23 FEBRUARY 2013(SAT)

今日見天氣都幾好，所以又係時候帶小小豬去放電啦！

由於今日要返小豬媽度食飯，所以就去左鰂魚涌海濱公園，等小小豬可以係條海濱長廊度跑吓、跳吓，極速放電。

當行過7-11，我突然好想食雪糕，就係咁小小豬又有機會食，睇佢食得幾滋味~

食完雪糕，見附近有個石卵路，所以就想俾小小豬試吓行，等佢感受一吓。原本都預計佢只係行幾步，點知依個大膽小小豬既然可以行晒成程，仲要唔係慢慢行(同平日行路速度一樣啦)，真係俾佢嚇親呀~

一到海濱長廊就開始跑啦~

行到去長者活動地方時，個傻仔又要玩埋一份添~

依個百厭仔又俾左另一驚嚇我，都唔知佢係邊度學返嚟，係度玩單槓，仲識得將個身體向前拋，真係嚇C呀(不過又幾攪笑)~

話佢危險嘅時候又係度傻笑~

依個仔真係大膽到冇朋友，都係去返兒童樂園啱佢啲~

**我的微博..關注吧**