小小豬病倒了

8 APRIL 2011 (FRI)

小小豬除左係打第四個月針時曾經發燒之外，都未曾有唔舒服，不過啲唔開心嘅事今日就要發生，因為小小豬發燒了。

一早起身抱起仔仔時，開頭都只以為小小豬係剛剛訓醒，所以全身都好熱。之後小豬媽一摸，就話唔對過似係發燒，所以即刻探熱，原來有成39度幾呀！

知道小小豬發燒，真係想即刻連工都唔返，留係屋企照顧小小豬。不過現實係唔容許我咁做，所以都係要返工。雖然有小豬媽照顧小小豬，不過始終都係勁擔心，成朝都冇晒心機做嘢呀！

一朝早就打電話去BOOK醫生，等到十點半先小小豬睇。終於我都忍唔住同老細講提早我個食飯時間，利用我LUNCH嗰一個鐘時間，帶小小豬去睇醫生。

開頭都以為係準備出牙仔或者係出疹先會發燒，一見到醫生就幫小小豬探熱，嘩....燒到103度，真係勁擔心。

醫生話小小豬唔係牙仔或者係出疹，係感冒引起，我都唔明白，小小豬又冇流鼻水、又冇咳，我地又冇痛帶佢去過邊，都唔知點解係感冒。不過醫生講得都要信，所以都係要乖乖咁同小小豬食藥，希望快啲好啦！

陪小小豬睇完醫生，我都安心左啲，起碼知道係乜原因。之後我就繼續返工，小豬爸就嚟車小小豬同小豬媽返屋企休息。

雖然好多人都話：小朋友唔病又點得大！不過，睇見小小豬個辛苦樣，真係勁肉痛。嚟緊真係要加陪好好咁照顧小小豬，唔好再令佢生病啦！