第三次講座

27 APRIL 2010 (TUE)

離開左聯合醫院之後，我地就向下一個目的地出發，就係出佐敦童軍總會聽講座，今次依個內容係講『母乳餵哺及初生嬰兒護理』~

雖然今次個講座內容都唔算太長，集中都係講母乳餵哺嘅好處，對初生嬰兒護理都只係提左好少部分，不過都有學到啲嘢呀！

原來母乳嘅營養真係好多，BB會少啲病痛同強壯啲，仲有就係BB會同媽咪關係好好，就算到大個啲都會成日跟住媽咪同錫媽咪多啲呀。另外，對媽咪身體好之後，仲會對產後身體復原好好添(醫生話仲係最有效嘅產後修身方法，哈哈...係就真係發達啦)。

雖然好處都有好多，不過都有啲其他問題，如果餵得唔好，媽咪就有機會有損傷或發炎情況發生，講座上醫生都有SHOW啲相俾我地睇，睇完都真係驚驚地，不過醫生話會發生嘅情況都唔算好大呀！

其實我一直都想係以母乳餵哺，因為睇左啲網頁講食母乳嘅BB係會健康啲同對媽咪嘅身體都會好，但就會辛苦啲，因為食母乳比食奶粉嘅餐數係多啲。

聽埋今次講座，我更改決定要餵母乳，只係怕到時自己唔可以堅持到，同埋身體狀況唔許可，不過為左小小豬可以健康成長，我都會盡量堅持，辛苦少少都係值得。