由籌備婚禮開始到現在，網誌都有十年了。一位全職傻媽及親子博客，喜愛利用網誌記錄我家嘅親子育兒及烹飪食譜。 讓Kinsey擁有一個快樂童年是我的目標，繼續分享我們這一家的生活傻事，見証Kinsey的成長。
今日大肥豬約左兩位兄弟去山林道金鳳食飯，我同依兩位兄弟都熟熟地，所以就同大肥豬一齊去啦！
其實係我未去過，成日都聽人講金鳳鋸扒又抵又好味，所以都真係好想去試吓呀！
我地大約七點未夠就去到，當時都唔係太多人，所以都坐得幾舒服。可能因為太早關係，加上之前食左一大碗南瓜西米露，完全唔覺肚饑，所以我都冇自己ORDER一份，偷大肥豬一塊仔就算啦！
食嗰方面都OK啦，佢地個扒份量係好大，都有成兩大塊豬扒，仲大過塊個鐵板，D肉仲好淋呀！不過其中一位兄弟話佢地落左梳打粉，所以先咁淋哦！
不過飲野嗰度又真係唔係幾好，杯餐飲真係細得過份，同普通茶餐廳"免費茶"個SIZE一樣，加大先係叫茶餐廳嘅正常SIZE呀！
成個餐廳個環境都一般(有少少似普通茶餐廳)，加上服務又麻麻，真係對金鳳有少少失望呀！(可能係我之前期望高左啦！)
今日帶左LULU妹去朋友仔度整負離子，所以成個下午又得番大肥豬一個係屋企。不過就係因為依個原因，大肥豬又俾左一個驚喜我啦！
我今晚食完飯返到屋企，就發覺屋企好大唔同..就係好乾淨呀！(平時都算乾淨，不過今日就仲整齊呀！)
原來成個下午大肥豬就做左住家男，做左好多野..換床單、拖地、洗左一機衫，又洗埋個神檯..做左好多野，總之就執得間屋好整齊啦！
除左執屋之外，大肥豬仲將我之前係油畫街買幅牡丹花畫掛埋上牆呀！
一個下午可以做咁多野，都真係唔可以唔俾個叻叻大肥豬呀！
其實一向大肥豬都有幫手做家務，某程度上佢仲做得仲多過我。不過今日佢一個人留係屋企做到咁多野，又真係令我覺得好開心，又感覺到自己好幸福呀！(哈哈..唔可以俾大肥豬知..如果唔係佢又飄飄然啦！)
今日返左小豬媽屋企食飯，食完飯見冇乜電視睇，加上又倦倦地，所以就早左少少走，諗住返屋企整吓嘢咁！
當我地返到屋企樓下，突然有人大叫大肥豬。原來就係奶奶，因為佢煲左D涼茶，所以就拎嚟俾我地，又帶左D生果俾我地食。
當我地見都奶奶時，都真係幾突然，因為之前都完全冇聽過佢話拎野俾我地。加上都成九點幾，佢應該都等左我地一段時間！
原來奶奶唔識用部新電話，所以唔識打電話搵我地，所以就係樓下公園仔等我地返啦！
依件都係一件開心事，因為佢專登拎野俾我地，都好感動。
不過就有少少內疚，要佢一個老人家係樓下等我地，雖然佢都係公園仔坐，但始終都唔好嘛！
真係...要快D教識佢用電話先得，等佢下次再嚟可以先打電話俾我地嘛！
拎左小茵BEAR BEAR之後，就去左花墟匯合埋大肥豬，買小盆栽啦！我地想買小盆栽擺係櫃面，美化下間屋，有D綠色野望落去都靚D啦！
我地行左一陣，就好快咁已經買到一枇細細地嘅萬年青，之後我地又去買埋玻璃樽同彩石珠仔啦！
離開時經過花園街，見到有一D好靚嘅幻燈擺設，會變好多顏色，真係好靚呀！大肥豬見我睇左好耐，所以就買左兩粒送俾我啦！哈哈..好開心呀~~
因為我地都好心急咁想快D返屋企整小盆栽，所以我地就食完飯就即刻走啦！
返屋企真係衫都未換就開始處理我地嘅小萬年青啦！
睇見人地D小盆栽整得好靚，以為好易啦...原來都幾難整呀。大肥豬整完又整(又唔俾我幫手哦！)...整左好耐先叫有小小成積，最後用左差唔多個幾鐘先完成呀！
都幾靚呀！不過我總係覺得好似石仔唔多夠咁，遲少少就再去加D先得！
大肥豬真係整上癮，話要遲D買多盆放係電視櫃上面呀！
但我諗都要睇下依盆小萬年青生長情況先決定，因為我種乜都種唔耐，好快就……
希望今次唔會啦，依盆小萬年可以快高長大，唔好浪費大肥豬嘅心機啦！
尋日我地學校開左運動會，一早七點幾就要去到運動場STAND-BY。唉...所以一早五點幾就要起身，六點幾就要係巴士站等車，真係慘啦！
雖然我個工作量都唔算多，留左係司令台做野，有一段時間都好忙，好在有同事幫手，所以都好快攪得到，仲冇做錯野呀！YEAH~~
但尋日嘅天氣真係太好啦...曬都我變左隻黑豬仔，真係要做番幾個美白MASK先得啦！
由於尋日太早起身，又忙左一朝，所以都真係都倦，當我食完飯番屋企，洗完白白之後就衝左去訓訓豬啦！(連電腦都冇開，就知我真係有幾倦啦！)
今日大肥豬話番我知....原來我尋晚真係好似昏迷咁，訓到冇晒反應，真係自己都覺得勁呀！
尋左一晚都總好似倦倦地，好似仲未訓夠咁，所以今晚又要早D訓先得啦！
係7-11剛剛開始換BEAR BEAR時，都係打算換一兩隻。不過依家換吓換吓，好似上左引咁，成日都好想去換BEAR BEAR....(連大肥豬都俾我攪到上引，同我爭住睇個盒仔係邊隻BEAR呀！哈哈)
經過我嘅努力(當然都好多謝朋友仔俾D印花我啦！)，係上個星期已經換左依四隻BEAR BEAR。
哈哈...我仲好開心咁，因為頭四次換都冇相同。某程度上都覺得自己好好彩，冇抽相同呀！
不過...好運原來係咁快就冇啦！
尋日..又再去換左三隻BEAR BEAR，點知....終於都相同啦！唉....都真係DOWN DOWN地，以為自己可以好快換晒。
我依家仲差『經典BEAR』同『燈芯絨BEAR』，唔知幾時先可以換整晒佢呢？
依家天氣開左回暖，當然又係換季好時機啦！
就係因為已經著左夏天衫關係，俾我發現左一個現象~~~就係原來我真係肥左好多..好多...好多！
頭先係商場玻璃見到自己，真係...覺得自己依家集合左三種動物於一身。首先就係『麒麟臂』、之後就係『豬腩肉』，同埋『大象腳』。唉...問你死未！
鬼咩..結左婚之後都冇再戒口，成日都係度食..食..食，加上係日本又餐餐都食飯....想唔肥都幾難呀！
依家真係發覺自己冇改錯名，直頭係一隻『小肥豬』！
雖然大肥豬話我肥肥白白都幾好，叫我唔好再走去減肥，不過，見到自己依家個樣...真係要迫自己檢討吓，唔可以再放鬆，唔可以俾自己再肥落去...
我地努力KEEP番....唔想做『肥師奶』呀！
我係唔係真係好似水魚..點解次次找著數都要向我埋手。
講真..一次半次我可以當真係唔記得，不過次次都係咁就一定冇可能啦！(仲要俾我知道佢對其他人唔係咁…嘩！乜事先…我好蝦D呀！)
依個問題都已經困擾左我一段時間，同佢講..又怕俾人感覺好小氣，冇朋友做，仲要俾人唱。
不過唔講…又怕繼續係咁(我自己當然好唔鐘意啦！)。
我都有諗過避，但點避呀！避得一時唔避得一世，唉…都唔知點算好！
講真，我自問都唔算係一個『孤韓』嘅人，大家係朋友就唔會斤斤計較，有時你請下我食野，我請下你飲野，都幾好呀！但次次都係咁…又點會唔令人反感呀！
不過當一個壞習慣已成養成時，大家嘅友誼係唔係已經變左質呢？
唉..我都唔識點講啦！總之…就係煩啦！
3月29日：第五天的行程
新宿 ~ 成田機場 → 香港
終於都到左最後一日，依日真係好...八點鐘先MORNING CALL，食完早餐有三個鐘自由時間，可以作最後衝刺去SHOPPING啦！
我地食完早餐就一支箭去左伊勢丹百貨公司買嘢，就係依日，大肥豬買左兩個 Agnes B袋俾我，哈哈~~真係開心啦！
買完袋之後，都冇乜野想再買啦！都係周圍行吓睇吓野，時間好快就過...我地又要集合啦！
我地食埋個午餐，就去成田機場啦！
去到機場三點幾，仲有成個幾鐘先飛。CHECK-IN之後，我地就入左去免稅店行吓。原來免稅店真係乜都有，都幾多野睇，我地仲用最後依個時間買左D草餅啦！
今次終於有窗口位坐啦！不過好攪笑，原本我地兩個係度玩自拍，點知有位空中小姐走埋嚟，問洗唔洗幫我地影相，我當然唔放過，叫佢幫我地影啦！哈哈~~
可能係天黑啦，雖然坐窗口位都好似冇野睇，不過大肥豬就睇得好開心，成程飛機都冇關窗呀！
我就悶左四個幾鐘，訓左一陣，終於都返到香港啦！
就係咁.....完成左我五日嘅蜜月之旅啦！
雖然係迪迪尼依日有少少失敗，不過整體上都好好玩，好開心呀！希望可以好快再去旅行啦！
3月28日：第四天的行程
全日東京迪迪尼
我地一早就去迪迪尼，我依個迪迪尼嘅FANS，真係超興奮呀！
係等導遊買入場卷時，見有間精品店，當然又去睇嘢啦..仲買左第一份迪迪尼禮物俾自己，就係小飛像頭裝飾。(因為我都好鐘意小飛像呀！)
終於都入場啦...
一入到去就見到好多公仔係度同人影相我就衝埋去想同佢地影啦，不過...真係好唔開心呀！因為佢地唔同香港排隊影，當我捉到隻公仔時，打算影啦！點知...一係佢唔理我，繼續同日本小朋友玩；一係就俾其他日本人捉去同佢地影，真你激死我啦！但依D公仔香港冇...所以都要去影。好在有其他團友一齊幫手，最後都影到幾張。
當影完之後，其中有一隻公仔(就係依隻白兔)竟然推開我....好唔開心呀！
之後我地就開始去玩啦！經一位團友介紹，我地第一時間就去『鬼屋』拎FASTPASS，見未夠鐘，又唔係太多人去『小小世界』，所以就排左半個鐘入去坐船仔啦！
玩完就剛剛好去『鬼屋』，其實我都幾驚依D野，不過見團友極力推介，咁就去啦！入到去其實一D都唔驚，仲覺得好佢地D效果好靚呀！
因為未夠鐘去拎另一個GAME嘅FASTPASS，所以就去左睇『3D電影』，講真...我就覺得麻麻地，都係香港嗰個好睇D。
當我地想去拎過山車嘅FASTPASS時，點知...竟然派晒，就連其他嘅GAME都派晒。見到條人龍都真係長到嚇人，D職員話要排三個鐘左右。嘩...點排呀！所以我地都冇再去玩其他GAME，周圍行下啦！
可能因為嗰時係日本學生放假，真係去到邊都係人，連食野都要排隊...唉！終於揀左一間冇咁多人排隊地方食野，當然...就勁貴呀！我地兩個人食左成二百幾蚊港紙，都係食得好普通.....真係唔太抵呀！
之後我地就入左去卡通地影相，因為我真係鐘意依D童話地方多D。嗰度真係好靚呀...D佈置又得意，所以我地都係嗰度留左好耐。
仲俾我見到好多公仔出嚟同人玩，我當然又走左埋去影..影..影啦！(不過個情況係同門口一樣...唉！等左好..好..好晒先影到呀！)
差唔多夠鐘巡遊，我地霸左一個都算OK嘅位睇啦！佢地真係出左有好公仔，隻隻都有特別打扮，好靚呀！不過我就覺得佢地好似氣氛唔係太好，音樂聲好細呀..係架車嚟到先聽到個音樂呀！
睇完巡遊，我地就開始去D精品店行街街買嘢啦！點知，係依個時候，竟然有好多人衝入嚟。原來...落大雨，雖然我地有雨傘，不過實在太大雨，D人又迫咁入嚟，所以就被困係度差唔多半個鐘....唉！
見細雨左...我地就去番大街行吓，諗住嗰度唔會整濕。點知...又係超勁多人，我地行都行唔到入去，都唔知點好。唉！
不過為左要買禮物，好辛苦先迫到入去，買完出番嚟都真係得番半條人命呀！慘...
邊度都係人...都唔知做乜好，仲有成三個幾鐘先走，所以大肥豬就提意我地自己早D走(因為原來導遊會係晚上九點幾先嚟接我地)，返酒店附近行吓。
於是，我地就打電話俾導遊問點走，見好似唔係太複習，所以就同埋另一PAIR團友一齊搭JR走啦！
雖然唔係太開心要早離開迪迪尼，不過都好..因為大肥豬成日都話要試搭JR，都可以話係另一個節目呀！
我地一上到去車箱見到個地圖，都真係有少少驚，因為太複習啦！好在....我地依導遊教我地方法，都好易去到...冇搭錯車，我地終於番到新宿啦！
返到酒店休息一陣，都係七點鐘左右，仲有時間去去行街街買嘢呀！
原本依一日應該係我成個旅程最開心嘅一日，可以去迪迪尼玩！點知，又勁多人，又落大雨....唉，真係勁失望，同埋...我真係覺得東京迪迪尼都唔係咁好，佢地好有民族感，唔多理唔我地依D非日本嘅人，(因為我地團入面都有一個BB 仔，D公仔都唔理佢，只係同日本人玩呀！SO POOR~~)
係依個時間都真係幾掛住香港迪迪尼，我相信我係唯一一個鐘意香港迪迪尼多過東京嗰個呀！
仲有其他嘅相，因為UP唔晒上BLOG，大家有興趣就CLICK去下相簿面睇吓~
3月27日：第三天的行程
HELLO KITTY LAND ~ 豐田汽車城 ~ 銀座 ~
淺草雷門寺 ~ 新宿歌舞伎町
今日個行程係非常緊密，又要由富士山區去返東京市一帶，所以一早六點就MORNING CALL啦！(真係一日比一日早呀！)食完個早餐之後，我地就上車再訓過。
去到我地第一個目的地，就係HELLO KITTY LAND啦！當我一入到去就見到好多玉桂狗嘅佈置(玉桂狗係我至愛呀)，原來三月係玉桂狗嘅生日月，所以用左嚟做主題佈置，真係開心死我呀！
當我地一行入去，就見到幾個玉桂狗朋友仔，我當然走埋去同佢地影啦！真係正呀...不過等左一陣都冇玉桂狗呀！
同公仔影完相，我地就去行精品店，邊影相邊掃佢D精品啦！
因為我地自由活動時間唔多，所以行完幾間精品店都已經夠鐘。好唔抵呀...係我地準備離開時，見到KITTY出嚟同人影相，原本我都想去排隊影，但因為人龍真係太長，又怕太遲返去...所以都冇得影呀！
去完我好鐘意嘅地方，第二站終於都到大肥豬鐘意嘅地方啦~~就係豐田汽車城啦！
我對車都真係完全冇興趣，不過就陪大肥豬睇吓，幫佢影吓相啦！(終於有一個地方係佢影相多過我啦！哈哈~~)
睇左一陣車，仲有少少時間就去附近個商場(唔記得左個名)行吓啦！
行過見到有得夾公仔，所以就去玩啦！我竟然好叻..第一次就夾到，真係勁開心，我都唔黑仔王得晒。哈哈~~
之後我地就去銀座，講真...都真係冇乜野睇，可能我地得一個鐘時間，唔敢行太遠。所以我地都係行左一陣，影吓相証明嚟過就算啦！
下一站就係雷門寺，去到時都已經係六點幾，因為時間關係，我地行街時間一個鐘都冇呀！基本上都係好快速咁睇下D鋪頭仔買乜！
之後就返去新宿啦！我地先去酒店放低行李，食完導遊安排嘅自助餐，我地兩個就去歌舞伎町出發。(終於都可以唔洗一早返酒店唔知做乜好啦！)
我地四周行，又去夾公仔(當然係夾唔到啦！)，又去行日本藥房，總之就係行..行...行..睇野啦，都係行到倦先返酒店呀！
我地住兩晚太子酒店，但間房都真係好...好...好細，不過日本市間間都係咁啦！雖然係細，不過我訓咁多間酒店，依兩晚係最好訓哦...可以一覺訓到大天光呀！哈哈~~
仲有其他嘅相，因為UP唔晒上BLOG，大家有興趣就CLICK去下相簿面睇吓~
3月26日：第二天的行程
平和公園 ~ 富士急動感樂園 ~ 京水莊溫泉酒店
一早七點幾就MORNING CALL(香港時間即六點幾)，真係幾早呀！我地食完酒店嘅早餐之後，就上車開始我地第二天嘅行程啦！
因為我地係入富士山區，所以車程都幾長。我地一上到車就當然係訓..訓...訓啦！
個導遊都幾勁...成程車都冇停過口，不停咁介紹。佢都幾盡責。不過對於我嚟講就覺得有少少嘈啦！(哈哈~~不過我地明白佢職業所需嘛，佢都唔想呀！)
未入到富士山區，我地第一個目的地就係平和公園，可以係嗰度睇櫻花。不過因為天氣關係，佢地成個公園都開得好少，只係得一棵開得最多，所以我地個個都去嗰度影相呀！
D櫻花都好靚呀...我地影完相之後就走啦！去下一個目的地...富士急遊樂場。
富士急樂園係富士山附近，可以見到富士山呀~~我地就係度影相。富士山真係好靚呀...
依個樂園就出名過山車好勁...不過因為我地都對玩依D興趣唔大(其實係驚~)，所以都冇玩，只係去左D兒童樂園影相行下呀...
玩左半日...就要走啦！
之後我地就搭車返我地嘅京水莊溫泉酒店，去享受浸溫泉啦！
去到酒店門口，發現佢地嘅櫻花比平和公園嗰D仲多仲靚，導遊見我地個個都好鐘意，所以就安排少少時間我地影相，遲少少先食晚餐。
食完飯，就要去浸溫泉啦！佢地依個溫泉係好傳統嗰D(即乜都冇嗰隻)，嘩...我原本都打算唔浸，因為始終衝破唔到自己心理關口。大肥豬都不停咁威迫利誘，始終都係...怕羞嘛！不過諗諗吓..都已經嚟左，都要試吓嘛！
所以就換衫去浸溫泉啦！
因為男女分開嚟浸，所以得我一個人入去時都真係幾驚。不過..好在入面可以話冇乜人，都只係得一對母女嘅團友，咁都冇咁驚。
原來浸溫泉真係好舒服呀~~我浸到有D唔想走呀，但因為感覺到有開始少少心跳，所以就走啦！
浸完就返去覺覺豬啦~~咁又完成左一日嘅行程！
仲有其他嘅相，因為UP唔晒上BLOG，大家有興趣就CLICK去下相簿面睇吓~
3月25日：第一天的行程
香港 → 東京 ~ 橫濱麵包超人專賣店 ~ 橫濱宇宙世界樂園~ 皇后購物廣場群
因為我地一早七點就要去到機場集合，所以我地四點幾就起身，搭頭班機場巴士。雖然係好早起身，不過係搭車途中我地一D都唔倦，仲好好精神咁睇風景...可能因為我地個心都已經飛左啦！哈哈~
去到機場，同導遊報到之後，就去食早餐，行一陣就入閘，過晒關就上飛機啦！
真係時間剛剛好...上機冇耐就飛啦！
係飛機度...悶左三個幾鐘(因為冇窗口位座)，食左一個好難食嘅飛機餐，訓左一陴....就到東京成田機場啦！
我地第一站就係麵包超人專賣店
我一見佢地個門口，就發傻咁係度不停叫大肥豬幫我影..影..影....。因為麵包超人又係我第三至愛，就門口已經有好多好得意嘅公仔呀！我又點可以放過呀~~
入度去仲發傻...因為真係好多麵包超人呀！我又係度影..影...影，行過見佢地D公仔..又拎嚟影...真係好開心呀！
不過開心時間過得特別快，一個鐘自由時間已經到，係時間要去下一個地方啦！
第二站就係皇后購物廣場同宇宙世界樂園，其實依兩個地方係我地酒店附近，所以都係自由行行。
我地先去左皇后購物廣場行街街，講真...真係冇乜特別，所以行左一陣就去食飯，之後就去左宇宙世界樂園玩啦！
唔知係唔平日關係，依個樂園好冷清冇乜野玩，我只係覺得佢地個摩天輪好靚呀！
我地都冇玩佢地D遊戲，因為都唔係太抵，上摩天輪都要$70一個人呀！所以只係行吓影吓影咁...我地就連佢地D兒童玩嘅GAME都去左影，大肥豬仲笑我同BB爭嘢玩呀！
行多一陣，我地就返酒店，因為第二日要好早MORNING CALL，所以要早D訓啦！
咁就過左我地第一日嘅活動啦！
仲有其他嘅相，大家可以CLICK去下相簿面睇吓~
