【清熱解毒又袪濕】龜板土茯苓瘦肉湯

17 APRIL 2020(FRI)

早幾日去藥材店入貨時，見到店主姐姐處理緊啲龜板，咁我就當然八八卦卦一下，因為成日聽見啲朋友介紹話濕疹飲龜板都唔錯，不過我就怕唔識處理，所以就一直卻步。

經店主姐姐講解，原來龜板都唔難處理，洗乾淨用薑水汆水就得。而且龜板主功能就係滋陰，如果加埋土茯苓就可以做到解毒袪濕，所以就好啱濕疹或者皮膚唔太好嘅朋友飲。

見處理唔難，又啱隻濕疹豬飲，所以就請姐姐幫我執一份材料，煲依個龜板土茯苓瘦肉湯啦~

龜板兩塊、土茯苓一両、淮山一両、茯苓一両、茨實半両、蜜棗兩粒、陳皮一角、紅蘿蔔一條、粟米一條及瘦肉約$40~

龜板洗淨後用加入薑水中汆水~

其他藥材浸洗一陣~

紅蘿蔔去皮切塊，粟米洗淨切段~

陳皮浸軟後刮瓤~

瘦肉洗淨汆水~

煲內放約3L水，然後隨水加入陳皮~

待滾起後，加入所有材料~

繼續用大火加蓋煲約15分鐘~

之後轉慢火加蓋煲多2小時~

最後加鹽調味，就可以飲得啦~

老實講，第一次煲龜板都勁擔心唔知係咩味，一陣小小豬唔飲就浪費晒我一番心機。不過，出奇地啖湯又好好飲，可能係加左紅蘿蔔同粟米，所以啖湯就特別甜，而且一啲藥材味都冇，所以唔洗催小小豬都超快手飲左三碗呀！

以下係各食材嘅功效，可以參考一下呀(網上資料)： 

龜板 - 滋補腎陰、補腎、提高白血球數量，以增強免疫力。

土茯苓 - 有清熱解毒除濕及通利關節之效

淮山 - 有益氣養陰，補脾肺腎，對脾胃虛弱、倦怠無力、食欲不振、肺氣虛燥有好大治療作用。

茯苓 - 能夠健脾，還可以滲濕，可以補脾肺，治氣虛。

茨實 - 有補脾化濕、益腎固精功效。

蜜棗 - 止咳潤肺、化痰平喘功效。

陳皮 - 有通氣健脾，消滯健胃的功能。

粟米 - 健脾和胃，利水通尿，益肺寧心。

紅蘿蔔 - 就有助健脾消食，同埋化痰解毒。 

溫馨提示： 
- 由於個別人仕體質不同，所以大家記得煲之前了解下自己，如有疑問，請先向註冊中醫查詢！