【清熱潤肺】菜乾羅漢果陳腎瘦肉湯

9 APRIL 2020(THU)

尋日煲涼茶開左半個羅漢果，咁就當然最好趁仲新新地快快手用埋佢(唔好浪費食材嘛)。個腦突然閃過菜乾嘅畫面，咁羅漢果、菜乾同埋陳腎個味又係好夾嘅，所以就開工煲嚟飲，當然除左好飲之外，依個湯仲有助清熱兼潤肺，好啱依個時候飲呀~

菜乾半扎(約半両)、羅漢果半個、陳腎兩個、紅棗六粒、百合半両、南北杏約一湯匙、紅蘿蔔一條、粟米一條、薑三片及瘦肉約$40~

菜乾洗淨及浸軟後，然後除去菜頭及切段，然後瀝乾~

陳腎浸至軟身，然後剪開~

紅棗洗乾淨後去核。其實在一個好簡單方法就可以去核，就係用先拎住一粒棗，然後將筷子由頂部開始，慢慢用少少力咁穿過去，就可以好輕鬆咁去核啦~

羅漢果壓碎~

然後與其他材料浸洗一陣~

紅蘿蔔去皮切塊，粟米洗淨切段~

瘦肉洗淨汆水~

煲內放約3L水，然後隨水加入薑皮~

待滾起後，加入所有材料~

繼續用大火加蓋煲約15分鐘~

之後轉慢火加蓋煲多1.5小時~

最後加鹽調味，就可以飲得啦~

以下係各食材嘅功效，可以參考一下呀(網上資料)： 

菜乾 – 菜乾含有豐富維他命A、B、C和纖維素，能消除內火清熱益腸，更可防治壞血病及皮膚病。 

羅漢果 – 清肺潤肺、化痰止咳、清肺潤腸 。

陳腎 – 有健脾消滯及下火清熱氣之用。 

紅棗 - 均補心脾及益氣安神。  

南北杏 - 可止咳下氣，潤燥消積。 

紅蘿蔔 - 就有助健脾消食，同埋化痰解毒。 

粟米 - 健脾和胃，利水通尿，益肺寧心。 

薑 – 抗發炎、祛寒強免疫。 

溫馨提示： 

- 因為菜乾都係比較寒涼，係煲湯時加埋果皮紅棗一齊煲，咁就可以中和返啦！ 

- 由於個別人仕體質不同，所以大家記得煲之前了解下自己，如有疑問，請先向註冊中醫查詢！