【小小豬廚房】400次咖啡

23 APRIL 2020(THU)

話說早排買齊材料想整400次超咖啡，經過四次努力我終於都成功，之後小小豬又話想試整，既然佢想整我就當然非常配合，俾佢嚟一個400次咖啡啦~

第一、二次打極到係完全冇反應，終於知道原因係因為用錯左三合一咖啡粉，唔得都可以有個藉口。 

第三次買左啱咖啡粉，係打都可以起少少泡，但總係打唔夠creamy。之後問左幾位好友意見，一係我啲熱水唔夠熱，或者我用打蛋器加大兜但材料份量少，所以失敗。 

終於第四次我就用左超熱嘅水，而且改用一個細啲嘅兜，再加上用一個打泡神器(我知...400次咖啡最好就係係用攪拌棒攪拌，不過...真係好攰，所以懶懶地出貓啦)，所以就得左啦！

將咖啡粉、白砂糖及熱水以「1：1：1」的比例放到碗中完全溶合~

即溶咖啡粉用打泡神器攪拌，令空氣充分地打進咖啡混合物之中，打發直至成奶泡狀~

其實打嘅時候見到咖啡泡越來越CREAMY，都好治癒嘅~

小小豬大約打左40分鐘左右之後，終於完成啦~

然後將咖啡泡沫放係牛奶上面~

最後可以係泡沫上面灑少少咖啡粉~

小小豬嘅400次咖啡就成功啦~

當佢成功打到之後，仲話叻過我一次就得左哦(緊係啦…因為有我成功經驗，再加埋打泡神器，又點會唔得呀)，不過...佢話打泡打到有啲悶，都係整蛋糕好啲，因為整完佢可以有份食哦。

不過杯飲品就.....，冇傳閒中咁好飲，或者係我唔太好咖啡啦... 哈哈！