【鴨仔陪豬過生日】B.Duck 樂活無窮@如心南灣海景酒店

10-11 AUGUST 2019(SAT-SUN)

今年生日小小豬就有好多B.Duck鴨仔陪佢，因為我地嚟左如心南灣海景酒店嘅「B.Duck 樂活無窮」主題住宿計劃，三口子開心又舒服咁過左兩日一夜呀~

其實自從暑假去左白石同小欖玩左兩次B.Duck水上樂園之後，小小豬就愛上左依隻黃色鴨仔B.Duck鴨仔，所以見如心酒店有B.Duck住宿計劃，所以就BOOK返一晚等小小豬開心一下。

其實成個如心集團酒店都有B.Duck主題，不過我地揀如心南灣海景酒店就因為佢係海洋公園附近，咁我地就可以順便去海洋公園玩一轉，咁就一條龍為小小豬慶祝生日啦！

嚟到酒店就當然第一時間去CHECK-IN，一入到大堂就已經有好多B. Duck踪影啦~

CHECK-IN完仲有一系B. Duck精品送返俾小小豬添~

一打開房間門，小小豬即刻尖叫起嚟。因為房間內床單、地氈、水杯、浴巾、咕臣、沖涼鴨仔仲有嗰一隻大SIZE嘅B.Duck，咁多鴨仔陪住佢，絕對可以用超興奮嚟形容佢呀~  

開心到兩父子都話留係房間HEA，唔想周圍去咁話哦~

係房間HEA完又未夠鐘去食自助餐，所以我地就係酒店周圍行下。原來係大堂有一個小小嘅咖啡角，環境舒服得嚟又免費咖啡提供，而且仲有得上網，所以三口子又係度HEA一番啦~

夜晚我地就去酒店餐廳嚟一個「火熱夏日避風塘自助晚餐」~

小小豬就最鐘意食自助餐，所以佢一入到嚟都不知幾興奮，周圍睇下有咩好食哦~

食物種類都好豐富，既有冷盤海鮮、刺身壽司之外，熟食都有好多選擇，兩位老細都大力推介即煎牛扒，我就鐘意食炒蜆同椒鹽瀨尿蝦。

係食物中都加入左B.Duck元素，所以小小豬多左一個任務，就係去搵B.Duck食物，目的就係要收集B.Duck旗仔，佢話要拎返屋企裝飾一下我煮嘅餸哦~

依隻小小豬真係拎左唔少B.Duck食物，佢仲食得好滋味添~

食飽飽正餐就到甜品時間，一系列甜品都好吸引(最好就係好食得嚟唔太甜)，當然仲有小小豬至愛嘅Häagen-Dazs雪糕啦~ 

返到房間就到左今次嘅重點之一，就係有一個好靚嘅B.Duck蛋糕等緊同佢慶祝~

小小豬見到個蛋糕都不知幾開心，仲話真係好驚喜呀...哈哈哈~

依個興奮豬仔仲許左一個長達一分半鐘嘅願望添(問極都唔肯講係乜，大個仔啦…要私隱哦..真係俾佢激C)~ 

第二朝起身就緊係去食個豐富嘅自助早餐~

之後就去戶外泳池游水，就咁佢兩父子又係度玩左兩個鐘(點解依隻豬仔咁早起身都可以玩咁耐，仲要一啲都唔攰呢)~

話咁快我地就過左兩日一夜嘅開心時光，係CHECK-OUT時小小豬不停話今個生日佢過得超級開心，又話非常滿足同充實，問我明年生日可唔可以都係一樣咁開心。

哈哈哈...只要佢乖乖唔好成日發傻，你叫我帶佢去邊都唔係一個問題啦！