【兩日一夜狂玩迎暑假】嘉湖夏「逸」涼浸浸

29-30 JUNE 2019(SAT-SUN)

由考完試開始小小豬都已經開著個放假MODE，日日都半天假嘅佢一放學見到我嘅第一句都係問：今日我地去邊度玩呀？係唔玩都唔安樂情況下，真係可以用超級無敵勁忙嚟形容我就啱。

每日玩我都已經好開心，今個週未就可以用超興奮嚟形容小小豬，因為我地應邀嚟嘉湖海逸酒店率先體驗佢地為暑假推出嘅「嘉湖夏「逸」涼浸浸」，有玩水之餘仲可以學做小廚師，今次仲唔係兩日一夜狂玩迎暑假~

一入酒店CHECK-IN之後，每位入住小朋友都會收到有一份小禮物，小小豬收到嘅係好可愛嘅海豚呀~

我地CHECK-IN之後小小豬就好心急要入房間，其實我地都入住過幾次，每次都住得舒舒服服，一覺瞓到大天光呀(住酒店...房間都係最重要一個環節呀)~

由房間望出去除左見到開揚景觀之外，仲可以望到今次活動玩水嘅場地，所以小小豬已經急不及待要換上泳衣，落去開始佢嘅放電工程啦~

每間客房會附送4張玩水遊戲卷，可以因應小朋友嘅喜好去玩4項戶外水上遊戲設施，包括水上滑梯、水上碰碰船、水槍大戰及水上滾輪(每個水上遊戲限時為8-15分鐘不等)。如果玩特唔夠喉，可以額外付$50購買一節時間繼續。

三位小男生第一個目標就當然係去玩水槍大戰(每節15分鐘)~

拿著水槍嘅小男生真係...可以用瘋狂嚟形容，不停追住我地嚟射，雖然我部GOPRO係防水，不過我個人唔防呢，所以依個地帶都真係極度危險，所以我地就遠觀佢地嘅開心玩樂啦~

接住小小豬就轉戰依兩個大小滑梯嘅水上滑梯(每節10分鐘)~

小小豬話大嗰個滑梯係超刺激，因為係中間有少少波浪咁彈下彈下，佢大大話話都玩左十轉有多，真係辛苦晒各位哥哥姐姐嘅照顧了~

睇見佢走來走去、又瀡來瀡去，玩完左邊又玩右邊，我地係旁邊睇都覺得攰，但玩緊嘅小朋友完全唔識個攰字，仲越瀡越開心添~

隻百厭豬瀡得實在太刺激了，所以就文靜少少去玩水上碰碰船(每節10分鐘)。都唔明依個小小豬，明明係攰都唔肯坐埋一邊休息一陣，唔通坐係碰碰船上玩住嚟叉電會快啲~

最後小小豬就去玩水上滾輪(每節8分鐘)~

其實依個水上滾輪有咩魔力呢？明明要等8分鐘先輪到佢，但唔肯玩住其他遊戲，要堅持企定定排隊等。但...見到佢係滾輪入面個開心樣，又彈嚟彈去，咁都估到係為左咩...就係鐘意做小倉鼠...哈哈哈~

玩水之後，我地就先回房間換衫，之後就去學做小廚神，齊齊整簡單又好味嘅「繽紛鮮果撻製作班」~

其實我都真係好鐘意參加COOKING CLASS，因為全部都係由零開始，之後跟住廚師姐姐指示一步步咁去整(當然....間中都要工作人員出手啦)，到個完成品出爐嗰一刻真係好有滿足感。

今日依個鮮果撻就由打雞蛋開始~

其實小小豬一向都係比較"輪盡"小朋友，不過今次佢又做得幾好，除左打雞蛋然後分開蛋白蛋黃對佢有點困難之外，其他部分都做得有板有眼~

好努力嘅小小豬終於完成個撻皮，可以拎去焗啦~

依個時候就要準備為切生果粒粒啦~

撻皮焗好之後，就可以塗上厚厚嘅吉士醬(OH....豬大少....洗唔洗塗咁多呀)~

最後就將生果放上撻面~

豬大少牌嘅鮮果撻出爐啦，新鮮出爐都真係特別好食，一個滿滿芒果嘅係為我而設(好明顯係因為有個小朋友唔食得芒果所以俾晒我啦)，另一個全部都係小小豬至愛嘅生果，唔洗講都知係為食豬啦~

開心放完電又做完小廚神，我地先各自回房間休息充充電(我指我地大人，小小豬一啲都唔覺攰)，之後就到酒店餐廳食豐富嘅自助餐晚餐。(註: 自助晚餐需另行收費，每兩個大人就可以有一個小朋友免費進餐或參與住宿計劃可以75折進食自助晚餐)~

今次主題係「環球美饌自助餐」，今次食物種類都有好多，我個人推介就一定係有海鮮盤，肥嘟嘟嘅生蠔同埋勁鮮甜松葉蟹腳，我地都食左勁..勁...勁多呀~

刺身同壽司都好新鮮呀~

仲有即煮日式叉燒烏冬，其實唔止叉燒，仲有粟米同獅子狗魚蛋，全部都係小小豬至愛嚟呀~

今次熱葷方面都好有驚喜，依個松子酥皮魚唔止睇得，仲好好食呀~

其他種類都唔錯呀~

不得不提依個鮑汁雞腳，真係勁好味超入味呀~

當然唔少得一系列甜品啦~

小小豬今個自助餐絕對可以話係超額完成呀~

食飽飽就當然係繼續玩，小小豬帶左佢近期熱愛嘅象棋同朋友仔齊齊玩~

舒舒服服瞓醒覺之後，我地就去嘆個豐富嘅自助早餐~

之後就當然係落泳池玩水啦~

都話小朋友嘅精力係無限，明明游左成個幾鐘水，佢地都仲可以提議去PlayRoom玩~

重新裝修嘅PlayRoom擴充左一倍，雖然啲玩樂設施比較啱年幼小朋友，不過咁大地方便佢地走來走去玩下波波池都唔錯呀~

小小豬玩到最後一分鐘先肯退房，話咁快就過左兩日一夜度假之旅，間中嚟一個小度假都唔錯(最重要係放下電腦手機嚟一個真度假，我比平日早瞓左好多呀....哈哈哈)，大小朋友都叉完電，人都輕鬆啲呀！ 



More information :
嘉湖夏「逸」涼浸浸
日期：12/7 - 31/8/2019 (星期五至日)
價錢：$1,030起 (2成人 + 1小童) 於7月21日前預訂可享85折優惠，另加10%服務費
- 標準客房住宿一晚 
- 紐約紐約國際美食自助早餐 
- 可愛動物公仔(每位小童乙份)
- 戶外水上遊戲四項(充氣水上滑梯、水上碰碰船、水槍大戰、水上滾輪)
- 繽紛鮮果撻製作班(乙節)
- 免費使用室外游泳池、健身室、蒸氣浴、桑拿浴、小朋友天地及戶外遊樂場  

備註： 
- 小童價目只適用於3至11歲之小童，每額外加一位小童需另加港幣$350 (包一位小童自助早餐、一個可愛動物公仔、一節繽紛鮮果撻製作班及四項戶外水上遊戲)
- 升級入住豪華客房每晚另加港幣$150
- 升級入住園景豪華客房每晚另加港幣$250 
- 以上價目須另加10%服務費
- 以上優惠不可與其他折扣或推廣優惠同時使用 

Booking link: https://bit.ly/2KUenpA 


「環球美饌自助餐」(18:30 - 21:30​ )
成人$468   小童 $330   長者 $438  加10%服務費
- 小童免費自助晚餐(2位成人正價，1位小童免費) 或 參與住宿計劃可以75折進食自助晚餐