【補腦提神】羊肚菌姬松茸栗子紅蘿蔔素湯

18 JULY 2019(THU)

依排日日同小小豬去街都冇咩時間煲湯，又係時候要做返一個賢妻良母。但行街市時都聽到話啲豬肉仍然好貴，所以都真係唔太敢買豬肉嚟煲湯住，所以依個時候又係時候要嚟一個素湯。

剛好有朋友介紹左依個好清甜嘅素湯俾我既，可以增強免疫力之餘，又可以補腦提神，啱晒我家兩位老細飲。最好就係屋企又有齊晒材料，咁就唔洗諗即刻快快手煲啖靚湯飲下啦~

羊肚菌有益腸胃助消化、化痰理氣、補腎壯陽、補腦提神等功效，用於消化不良、痰多氣短。另外還具有強身健體、預防感冒，增強人體免疫力的功效；姬松茸具健腦、消炎、益腎、降血壓、降膽固醇、降血糖同埋改善肝功能，仲有抗過敏及改善骨質疏鬆等功效；合桃有補腎補腦、健胃補血、潤肺養神功效；腰果能夠健脾補腎及止久渴；栗子可養胃健脾，更可益氣補腎氣；紅蘿蔔可健脾寬中及治咳嗽；粟米健脾和胃，利水通尿，益肺寧心；陳皮理氣健脾、燥濕化痰；蜜棗止咳潤肺、化痰平喘功效 (網上資料) 

羊肚菌六粒、姬松茸十二條、合桃兩両、腰果兩両、栗子半磅、粟米兩條、紅蘿蔔一條、蜜棗三粒、陳皮一角~ 

羊肚菌用清水浸至軟身，之後剪開去除雜質~

姬松茸洗淨後浸至軟身~

羊肚菌及姬松茸浸軟後要擠乾水份 (一定要瀝乾所有水份先可以放入煲，如果唔係啖湯會有苦味呀)~

陳皮浸至軟身，然後刮囊~

蜜棗、栗子、腰果及合桃浸洗一陣~

紅蘿蔔去皮切塊~

粟米洗淨切段~

煲內放約3L水，然後隨水加入陳皮~ 

待滾起後，加入所有材料~

繼續用大火加蓋煲約30分鐘~

之後轉慢火加蓋煲多1.5小時~ 

最後加鹽調味，就可以飲得啦~

溫馨提示： 

- 由於個別人仕體質不同，所以大家記得煲之前了解下自己，如有疑問，請先向註冊中醫查詢！