【小朋友幫小朋友】麥當勞愛心慈善跑2018

1 DECEMBER 2018 (SAT)

一年一度嘅「麥當勞兒童愛心馬拉松」又嚟啦，原本以為我地撞左學校童軍集隊所以唔可以嚟參加，但原來全日有三場活動，我地趕得切參加四點場次，所以我地終於都可以嚟參加啦~

今年係小小豬第二年參加(上年我地都有報名，只係因為撞左學校活動所以去唔到)，所以隻傻豬仔知道今年可以去跑嘅時候佢都不知幾興奮~

我地登記報到之後，即刻換好戰衣就等待出發啦~

其實整個「麥當勞兒童愛心馬拉松」活動都係為麥當勞叔叔之家慈善基金籌款，為有需要的病患兒童及其家人，提供一個鄰近醫院嘅臨時居所，等病童係康復期間省卻舟車勞頓之苦，安心養病。所以場內都有麥當勞叔叔紅白間襪以$20作慈善義賣，為小朋友籌款我地當然係非常支持，所以小小豬就買幾對...小朋友幫小朋友嘛~

未正式開跑之前，小小豬就去玩兩個小遊戲作為熱身啦~

簡單又隆重嘅開幕儀式開始之後，大家就跟麥當勞叔叔做熱身運動~

一聽到大會嘅哨子聲，小小豬就已經一支箭咁跑...跑....跑...啦~

我地圍住跑馬地沙圈跑一圈，全段路程太約都有成兩公里，基本上佢兩父子全程都係一支箭咁跑，完全冇理我嘅存在，我亦都追唔切佢地~

所以佢有佢地嘅跑，我就有我嘅慢慢行...哈哈哈~

佢兩父子就越跑越開心，所以話咁快就跑到去終點~

我就比佢地足足遲左二十分鐘先到終點，遲快唔緊要...最緊要係完成嘛(俾多啲時間佢兩父子講秘密啦)~

跑完之後小小豬就已經急不及待話出年都要參加，要再嚟跑多一次？嘩...小朋友嘅精力真係何其多，我行完之後對腳都已經好似唔屬於我啦！

不過，麥當勞叔叔之家係一個有愛心嘅活動，我地當然要大力支持，出年再嚟跑過(我諗...到時我都係行多...哈哈哈)！