【簡易快靚正】紫菜豆腐肉碎湯

19 JUNE 2017(MON)

激C我…早幾日煮煮下飯，依個小小豬入左嚟廚房，以為佢咁乖仔嚟幫手開飯，但原來係問我今日煲左咩湯或者涼茶。 當知道今晚冇涼茶又冇湯時，佢竟然大興問罪，話食飯冇得飲會唔Enjoy(佢仲要好認真嘅樣)，聽到都唔知好嬲定好笑。 

天氣咁熱，困係廚房都真係幾辛苦，尋日先飲完湯，偷懶一日都唔俾，依個小老細真過份呀！

不過……其實佢都係鐘意我啲愛心湯水，我開心都嚟唔切，所以雖然今日諗唔到煲咩老火湯，咁就簡單煲個紫菜豆腐肉碎湯滿足一下小老細啦~

豆腐含有豐富蛋白質，而且有益氣和中、生津潤燥、清熱解毒的功效。紫菜含碘量高，可降血壓及防止甲狀腺腫大。(網上資料)

材料就有紫菜1片、包仔豆腐一塊、肉碎約$15及薑兩小片~

薑洗乾淨然後拍鬆；豆腐切粒粒~

 紫菜以清水浸軟；肉碎沖洗乾淨，然後加鹽½茶匙、糖½茶匙、生粉1茶匙及油1茶匙醃大約15分鐘~  

煲內放約1.5L水，然後隨水加入薑片~

 

待水滾後就可以加入肉碎~

 

繼續用大火加蓋煲約10分鐘~ 

 

然後轉慢火後加入紫菜繼續煲約10分鐘~

 

最後加入豆腐粒粒再待煲滾後，加少少鹽調味(加左豆腐之後唔好煲太耐，如果唔係啲豆腐就會好"鞋"啦)~

就可以飲得啦~

  

又係一個既係餸又係湯嘅晚餐，咁就可以等我懶懶地之餘，又可以滿足一下要求高高嘅小小豬啦！

唔好以為依個紫菜豆腐肉碎湯，只係一個方便快捷嘅靚湯，佢仲好有營養，完全係快、靚、正靚湯，所以夏天都係煲多啲依簡單湯水啦！(大熱天......減少係廚房時間，人都舒服啲啲....哈哈哈)

溫馨提示： 

– 由於個別人仕體質不同，所以大家記得煲之前了解下自己，如有疑問，請先向註冊中醫查詢！