迪欣湖

6 JUNE 2010 (SUN)

原來都冇打算今日再出街，諗住係屋企休息休息。不過因為樓上個單位裝修，間唔中就發出啲鑽牆聲，攪到想休息吓都唔得。

為免啲鑽牆聲影響到小小豬，所以大肥豬就帶我出去行吓，我地去左邊，就係入左迪欣湖行吓影吓相啦！

迪欣湖我地都唔係第一次去，上幾次入去都係為左去玩水上單車，但今次先算係正正式式行左個公園一圈。

由於個公園都好大，所以開頭我都好驚會行到勁攰，不過我地邊行邊影相，行吓就坐吓休息咁，加上個天氣都算唔錯，所以都唔算太辛苦。

原本係想影大肚相，不過著錯左條鬆身裙仔，攪到都唔似大肚添~

我地仲係迪欣湖見到有好多家庭一家大細係度野餐，見到啲小朋友係度玩吹泡泡同踏單車，睇佢地玩都覺得開心呀。

雖然就好似遠左少少，不過依個迪欣湖又不失為一個家庭樂嘅好地方，所以第日都會帶小小豬嚟依度玩先得。