靚靚水仙花

11 FEBRUARY 2010 (THU)

之前小豬媽教過新年要擺盆水仙花係屋企，咁即表示係旺夫，所以由新婚第一年開始過年都已經擺盆水仙，實行等大肥豬可以旺一旺嘛！

其實小豬媽一早都已經幫我留意啲水仙，想幫我買盆靚花，不過依排啲天氣真係好唔穩定，攪到市面上好多年花都已經開晒，所以都好難揀到盆又靚又合時嘅水仙，冇理由買盆花返屋企未到新年就已經開晒花嘛。

原來真係好難搵，我知道小豬媽差唔多行遍成個東區有花買嘅地方都搵唔到，最後小豬媽明知會貴啲都去左到維園花市幫我搵盆靚嘅水仙花。

終於都買到啦，盆水仙真係好靚~

好多花芯之餘仲係慢慢開緊添~

睇個生長情況，時間應該會剛剛好，等到初一就會開花...咁就花開富貴，大肥豬係虎年一定會旺~旺~旺~~啦...哈哈！

除左要多謝小豬媽幫我搵到盆靚花之外，仲要多謝小豬爸，因為係小豬爸送俾我呀。