【提高免疫力】哈密瓜姬松茸螺頭湯

5 SEPTEMBER 2020(SAT)

尋日買左個哈密瓜，當生果食左半個之後，醒起之前藥材店姐姐教路話可以用哈密瓜加姬松茸同埋螺頭嚟煲湯，可以提高免疫力之餘仲可以補脾胃，而且啖湯都會好清甜添。

聽到覺得好吸引，屋企又齊晒材料，就當然要煲返轉俾兩位老細試下啦~

哈密瓜半個丶姬松茸一両丶螺頭一両丶淮山一両丶漳州雪耳一両丶海玉竹半両丶腰果約一飯碗丶蜜棗兩粒及陳皮一角~

乾螺頭用清水放在雪櫃浸一晚~

姬松茸洗淨後浸至軟身，然後瀝乾水份(一定要瀝乾所有水份先可以放入煲，如果唔係啖湯會有苦味呀)~

漳州雪耳浸透，然後剪去硬蒂~

陳皮用水浸軟後刮瓤~

腰果、淮山及海玉竹浸洗一陣，隔水備用~

哈密瓜去皮去核之後切塊，切嘅時候最好就切大件啲~

煲內放約3L水，然後隨水加入陳皮~

待滾起後，加入所有材料~

繼續用大火加蓋煲約15分鐘~

之後轉慢火加蓋煲多1.5小時~

最後加鹽調味，就可以飲得啦~

我都係第一次用哈密瓜嚟煲湯，所以初時都有丁點擔心，不過好在出嚟效果都唔錯，就算我今次冇落肉，啖湯都好夠味之餘仲好清甜，原來哈密瓜同姬松茸係咁夾嘅，所以兩位老細都好滿意我今次嘅生果湯呀！

以下係各食材嘅功效，可以參考一下呀(網上資料)：

哈密瓜 - 有助清理人體內的膽固醇，可以軟化血管也能預防肥胖，此外，亦能潤肺止咳、清心安神，及養陰益氣，對提高人體素質有很大的好處。

姬松茸 - 具健腦、消炎、益腎、降血壓、降膽固醇、降血糖同埋改善肝功能，仲有提高消化和免疫系統功能。

螺頭 - 滋陰潤燥補肝腎。

淮山 - 補脾胃及益肺滋腎。

漳州雪耳 - 有助潤肺、潤膚同養顏嘅功效。 

海玉竹 - 清熱、養陰、生津、潤燥、潤肺作用。

陳皮 - 理氣健脾、燥濕化痰。 

蜜棗  - 止咳潤肺、化痰平喘功效。

腰果 - 素湯加入腰果，可令湯更鮮甜濃稠，卻不會像肉湯般油膩。

溫馨提示： 

- 由於個別人仕體質不同，所以大家記得煲之前了解下自己，如有疑問，請先向註冊中醫查詢！