【清肝明目】日月魚清補涼杞子湯

13 SEPTEMBER 2020(SUN)

又係日月魚時間，冇辦法啦...依隻四眼豬除左平日要好好保護眼睛之外，都要飲多啲補眼嘅湯水先得呀！

今次就簡單啲買左包現成嘅清補涼湯包，再加埋日月魚同粟米、杞子...，好適合眼乾眼澀人士同近視加深嘅人飮用，等雙眼立即變得精精靈靈~

清補涼湯包一包丶日月魚一両丶杞子一両丶圓肉一両丶陳皮一角丶粟米一條及腰果約一飯碗~ 

清補涼湯包一般都係以健脾袪濕同提高免疫力為主。材料就有生薏米、淮山、沙參、海玉竹、蓮子、茨實、南北杏、百合同埋蜜棗~

日月魚洗淨後浸至軟身~

其他藥材浸洗一陣~

陳皮浸至軟身，然後刮囊~

腰果浸洗一陣~

粟米洗淨去皮切件~ 

煲內放約3L水，然後隨水加入陳皮~ 

待滾起後，加入所有材料~

繼續用大火加蓋煲約15分鐘~

之後轉慢火加蓋煲多1.5小時~

最後加鹽調味，就可以飲得啦~

雖然整個湯都係以藥材為主，不過飲落又唔會好重藥材味，仲帶有點點鮮甜味，所以小小豬都飲左三大碗呀！

以下係各食材嘅功效，可以參考一下呀(網上資料)： 

清補涼湯包 - 健脾袪濕同提高免疫力。 

日月魚 - 明目功效高、舒緩眼乾、補腎益肝、養顏美髮功用，含有豐富蛋白質、磷、鐵、碘及鈣質，所以對調節人體代謝平衡及促進生長都有一定幫。 

杞子 - 滋補肝腎、益精明目功效，及提高身體免疫力。 

圓肉 - 開胃健脾、養血安神、壯陽益氣、補虛長智的功效。 

陳皮 - 理氣健脾、燥濕化痰。 

粟米 - 健脾和胃，利水通尿，益肺寧心。 

腰果 - 素湯加入腰果，可令湯更鮮甜濃稠，卻不會像肉湯般油膩。 

溫馨提示：
- 由於個別人仕體質不同，所以大家記得煲之前了解下自己，如有疑問，請先向註冊中醫查詢！