【星馬親子之旅】樟宜機場T3免費任玩瀡滑梯

20 AUGUST 2018(MON)

由我地決定新加坡旅程開始，小小豬比我仲心急咁刨旅遊書，因為佢想知道有咩啱佢玩。經佢刨完又刨，除左佢嘅主目的地新山LEGOLAND之外，有一個地方係佢堅持一定要去，依個咪就係樟宜機場T3入面嗰一條免費任玩嘅瀡滑梯~

其實機場第三號客運大樓入面係有兩條巨型滑梯，其中一條係有成4層樓咁高(大約12米)，佢唔單止係新加坡最高嘅滑梯，仲係世界上最高嘅室內滑梯。

依條12米高嘅滑梯只要係機場內消費滿10蚊新加坡幣就可以免費遊玩一次，不過身高未夠1.3米就唔可以玩，所以....仲係"矮得得"嘅小小豬就冇得玩啦~

望落去又真係幾高，我諗瀡落嚟一定好激度。不過年紀大唔嚇得啦，所以都係望左當玩左啦....哈哈哈~

咁小小豬又可以玩邊條？佢就可以玩係地庫二樓嗰條有1層半樓高嘅滑梯，依條仲係免費任玩呀~

小朋友只要乖乖排隊就可以玩啦~

場地都冇職員當值，所以都係靠小朋友自己自律，一個跟一個再按鍵入去玩啦~

雖然只係有大約4米高，不過我見小小豬都瀡得好快，佢話瀡得好刺激呀~

睇佢次次瀡落嚟個開心樣就知佢有幾鐘意玩啦~

基本上新加坡嘅安全我都唔太擔心，所以我都係企定定一個位置等小小豬自行放電。不過我地可以係出發點望到個直播電視睇到小小豬瀡完嘅情況，所以更加安心俾佢自己玩~

就係為左依個瀡滑梯，我地預早左嚟機場俾佢玩過痛快，依個懶玩豬真係好鐘意，瀡左差唔多有十次先肯離開，為我地新加坡之旅作一個完美嘅句號...哈哈！(亦都因為放晒啲電，一上到飛機就連飛機餐都冇食，咁就一瞓返到香港啦)