【迪士尼另類行】遊船河入迪士尼

13 JULY 2017(THU)

作為一名迪士尼小粉絲，同迪士尼有關嘅活動都一定會留意。今年年頭知道天星小輪新開辦左來往尖沙咀至迪士尼嘅航線時，都已經好想感受一下，睇下隻迪士尼係點，但無奈票價都真係有少少貴(成人$180/小童$160)，所以一直都係得個想字。

不過...機會終於到嚟啦，係FACEBOOK突然見到有優惠APP彈出，每人來回都只係$20，見到嗰一刻真係即刻醒晒，當然即刻開APP上網搶位，所以小小豬放暑假第一個節目就係遊船河入迪士尼~

 

一同小小豬講我地搭船入迪士尼，佢都已經不知幾興奮，仲一早就要我出門口。原來11:00先開船，我地10:30就已經到左，好在都有個靚位俾我地休息，乖乖地坐下等船嚟啦~

 

Yeah...「世星」嚟啦~ 

 

經過改裝嘅「世星」好似同普通天星小輪冇乜分別，但一入到去就感覺到完全唔同，空內有冷氣就唔在講，兩旁都係全玻璃，睇風景一絕呀~

 

以迪士尼為主題，當然唔少得米奇頭，窗框、自動門上、桌子都可以搵到唔同嘅MICKEY踪影呀~

 

除左空內之外，船頭及船尾都有露天觀景位，而且又擺放左好多梳化椅，所以總會搵到一個舒服位欣賞風景~~

好天氣就真係咩都靚啲，風景靚啲，人又靚啲，心情都好啲~

 

不過...由於正烈日當空，小小豬終於都頂唔順，所以我地就返回室內。我地船票仲包一款飲品同一包小食，涼住冷氣邊食邊睇風景，咁舒服真係歎到唔識形容呀~

 

大約45分鐘船程，我地終於到左迪士尼碼頭啦~

 

到左迪士尼碼頭之後，我地可以選擇等待15分鐘原船返尖沙咀碼頭，亦都可以選擇搭六點嗰班回程船。既然嚟到，小小豬就當然選擇留係度玩到六點先走啦~

 

迪士尼我地間唔中都去，原來碼頭依邊都幾靚哦~

 

我地有咁多時間，見天氣真係超級好，所以我地就留係海濱長廊依度，慢活人生做個健康快樂人~

 

沿住依個海濱長廊慢慢行，仲可以去晒三間迪士尼酒店，所以我地就出發啦~

 

我地慢慢行左大約20分鐘，就到左香港迪士尼樂園酒店啦~

 

嚟就酒店就當然入去行下SHOP，涼返冷氣過下冷河~ 

 

當然唔少得去迪士尼個花園迷宮同小公園玩陣啦~

 

之後繼續出發行我地嘅海濱之旅~ 

 

係咁靚環境慢行下，行左大約15分鐘，就到左迪士尼探索家度假酒店。上次入嚟住過，成日都好掛住個悠悠大草地，所以就嚟周圍行下，順便去食返個簡單午餐啦~

 

抖夠玩夠就當然繼續行，向我地嘅第三間酒店進發~

 

雖然係熱左啲啲，不過對住個咁好天氣，人都特別開心~

 

平日我地兩母子都成日拍拖去玩，不過又真係好似好少係陽光下傾心事，難得好天氣就同小小豬齊齊坐一陣，吹吹海風感受好靚嘅雲海啦~

 

終於到嚟到最後一站迪士尼好萊塢酒店，其實慢慢行過嚟都只係十分鐘左右，不過我地又行下坐下，終於要成三十分鐘先到。唔緊要啦....慢活人生就應該係咁嘛...哈哈哈~

 

同小小豬玩完小公園，行完小草地，我地就沿海濱長廊慢慢行返去迪士尼碼頭了。

今次我地冇再返去酒店休息，一口氣行左大約45分鐘就返到碼頭，剛好天氣唔太曬，又可以慢慢坐定定欣賞風景了~

 

仲有少少時間，我地就行入碼頭，睇下啲公公釣魚碼頭，悠悠閒閒等船嚟接我地回程啦~

 

去程時因為都曬曬地，我地就入左室內坐。不過回程天氣都唔錯，有少少風得嚟又唔曬，所以我地就露天甲板上啦~

 

係船上睇風景真係另有番味道，所以間中去遊船河，忙裡偷閒都真係唔錯呀~

 

原本我地想一直留係甲板上，不過因為開始大風浪，船長叔叔擔心有危險，所以我地就聽話乖乖返回室內啦~ 

悠悠閒..輕輕鬆就過左一日慢活生活，其實都真係勁舒服，$40就可以玩一日，真係又好抵(當然唔計我地入左迪士尼酒店食小吃啦)。

雖然依家優惠APP己經完結，雖然冇得搭平船入嚟(當然我依個師奶仔仍然會繼續密切留意啲優惠)，但其實平日有時間嚟行下海濱長廊之餘又可以去三間迪士尼酒店HEA下，都唔錯呀.....迪士尼又唔止得樂園，仲有好多另類行呀！