夏天除左煲啲袪濕涼荼之外,消暑開胃嘅涼茶都真係唔可以缺少,因為天氣咁熱,都好易影響食慾嘛。今次就煲左洛神花蘋果粟米茶俾小小豬,估唔到又幾好飲哦~
我之前都煲過洛神花茶,嗰一次就係用新鮮洛神花。其實味道都唔難飲,入口就有點似濃味利賓納,不過小小豬就唔多鐘意,因為酸味就比較重,所以之後就冇再買嚟煲。但今次就用洛神花乾再加上蘋果同埋粟米一齊,我諗都應該好啱小朋友飲,所以就買齊材料煲啦!
洛神花都好味又有富營養,有助生津潤肺、除煩、開胃、醒酒嘅功效。而且仲可以更有抗衰老,潤膚美顏,降血脂,降胆固醇作用。(網上資料)
洛神花乾沖淨~
粟米去衣,洗淨切件~
蘋果去芯後切成細粒,記得洗蘋果前會用刀刮一圈,刮走那一層果蠟,咁連皮煲湯時就可以飲得安心啲啦~
煲內放約1.5L水,然後隨水加入所有材料(冰糖除外)~
用大火加蓋煲約10分鐘~
然後轉慢火加蓋煲多20分鐘~
最後加入適量冰糖,再煲多5分鐘就可以飲得啦~
我同小小豬都鐘意雪凍佢先飲,因為凍冰冰又酸酸甜甜,好啱夏天飲呀~
哈哈哈...由初時唔多願意嘗試,到之後不停添飲,我想小小豬都好鐘意飲依款洛神花茶了。好...就等我趁依個夏天煲多幾次先得!
溫馨提示:
– 由於個別人仕體質不同,所以大家記得煲之前了解下自己,如有疑問,請先向註冊中醫查詢!
– 煲完可以置室溫冷凍後放入雪櫃後,不過最好係3日內飲完,如果唔係怕依家炎熱天氣易變壞,到時就有益變有害啦!
– 由於個別人仕體質不同,所以大家記得煲之前了解下自己,如有疑問,請先向註冊中醫查詢!
– 煲完可以置室溫冷凍後放入雪櫃後,不過最好係3日內飲完,如果唔係怕依家炎熱天氣易變壞,到時就有益變有害啦!
沒有留言:
發佈留言