海港城 x PizzaExpress 慈善親子PIZZA工作坊

30 JULY 2015(THU)

今日小小豬同埋魚子醬、SY哥哥齊齊化身成為小廚師，因為我地應邀出席海港城 x PizzaExpress嘅親子PIZZA工作坊。同朋友仔一齊有得玩又有得食，仲可以做善事，真係超級開心呀~

今次我地做小廚師嘅地點就係海港城內嘅KidX，而工作坊主要就係教小朋友利用食材設計WALLY PIZZA！

依個活動其實都係一件慈善活動，因為每位參加者係需要現場捐款HK$200，而所有費用都會全數捐到香港血癌基金，所以一個咁有意義活動我當然即刻答應參加啦！

今年海港城以WALLY為主題，所以WALLY嘅展覽及佈置， 就以KidX為例，都有好多WALLY，真係充滿歡樂氣氛呀~

哈哈哈...小小豬又學人扮WALLY，似唔似呢~

三位小廚師著好晒衫就可以開工整PIZZA~

大會其實都準備好個餅底，我地嘅小廚師只需要利用食材砌個WALLY樣係PIZZA上面~

聽完姐姐講解之後，大家就開始砌..砌...砌啦~

都總算小小豬砌到個人仔樣出嚟，起碼都叫做有兩粒眼睛同有個笑笑口，似唔似WALLY呢.....唔好太深究啦...哈哈哈~

第一個步驟完成之後，司儀姐姐就教我地之後應該點做~

就係依個時候，小小豬突然行去司儀姐姐度，搶咪傻笑一番，真係激C我，失禮C人呀~

從來我問返佢仲乜會咁，佢話姐姐問嗰個問題佢識答，所以就去答問題哦。不論小小豬點解釋，佢咁做都係唔啱，我已經同佢講左一大篇道理，應該(希望)唔會有下次啦！

其實姐姐係教我地落芝士嘅份量，三位小廚師都有好專心聽書，所以都做得幾好哦~

登登登登....我地嘅PIZZA可以話完成，嚟影張相先~

之後大會就幫我地拎啲PIZZA去焗啦~

PIZZA需要焗大約八分鐘，依個時候大會就係小朋友準備顏色簿及蘋果汁飲，等小廚師們玩住得呀~

小小豬整嘅PIZZA出場啦~

見到自己有份整嘅PIZZA，依隻為食豬又點會唔心急，今次仲唔係即焗即食...哈哈哈~

可能係即焗即食關係，個PIZZA真係好味好多，個餅底好鬆軟，加埋小小豬落重料嘅芝士，真係100分呀！

如果大家都想好似小小豬咁整個好味PIZZA，咁就要快啲將姓名、電話、所選日期電郵至harbourcitykids@gmail.com預先報名，之後即場捐款HK$200予「香港血癌基金」就可以。嚟緊仲有四場，日期分別為8月4及5日嘅3pm - 4pm、4pm - 5pm 。

另外，海港城仲有另一個慈善工作坊“Capture the Happiness”係做WALLY相架。日期分別係8月1、2、8及9日(星期六、日)下午2時至6時，只需要即場捐款HK$40予「思覺基金」就可以參加啦！

海港城亦都推出左Where's Wally慈善環保袋，每一個為HK$250，而且全數收益都會撥捐「思覺基金」， 個袋質素都真係唔錯呀~

有得玩之餘仲可以做善事，所以希望大家都大力支持啦！

 

More Information :
海港城
Website：http://www.harbourcity.com.hk/
Facebook：https://www.facebook.com/HarbourCity

PizzaExpress
Website：http://www.pizzaexpress.com.hk/
Facebook：https://www.facebook.com/pizzaexpresshk