李行齊國際魔法城堡@科學園

7 AUGUST 2015(FRI)

今日我地兩母子拍拖入左科學園玩，因為我地應邀嚟參加科學園暑假重點活動 - 「動感科學園地 - 2015李行齊國際魔法城堡」~

其實之前嚟科學園參加唔同種類嘅工作坊，我都係覺得好好玩，因為活動上可以等小朋友從遊戲中加入少少科學元素，咁就可以係玩嘅同時又學到少少知識，真係唔錯呀！

不過論期待嘅就當然一定係今次依個嘅暑假重點活動，因為有我同小小豬最鐘意睇嘅魔術活動，所以就算今次冇老公渣車車我地嚟，我同小小豬都一定要搭車嚟玩一轉~

一入到科學園，小小豬已經急不及待咁問我幾時去睇魔術。我地今場係整個活動嘅第一場次，唔好話小小豬，我都好心急入場睇啦~

不過，因為我地早左嚟會場，所以未入場睇SHOW之前，我地係場外啲小攤位玩下一啲小魔術先。1個TOKENS玩一個小遊戲，而且仲有一份少少嘅魔術送俾你，最好就係即場有哥哥教點玩呀~

玩到夠鐘我地就排隊入場，由於門票係不設劃位，所以想搵個靚位就要早少少去排隊啦！雖然我地坐唔到正中第一行依個靚位，不過我地都坐係旁邊第一行，都一樣睇得好清楚呀~

原來整個SHOW係不準拍攝，所以之後我就乖乖咁專心睇表演啦，小小豬都睇得好興奮呀~

整個SHOW都好好睇，睇到我"WAWA聲"，不停問"點解嘅"，真係十萬個為什麼呀！

既有大型魔術表演(有一個仲係首次公開表演)，中段亦有一啲小魔術，亦都有啲同觀眾互動環節。其中曾邀請兩位小朋友上台協助表演，不過小小豬唔敢舉手，佢話好驚哦！

緊係啦....當睇到之前類似刀据美人表演時，小小豬真係好驚咁伏係我身後，佢一定係驚魔術師變走佢啦~

真係精彩時光過得特別快，一個鐘嘅SHOW就話咁快完結，我仲好唔知醜咁搵小齊同我影合照添~

係臨離開會場時，小小豬見到個大型MINIONS，負責姐姐仲俾佢穿入去扮MINIONS行幾步添~

睇完精彩魔術表演，我地就去參加科學工作坊啦~

第一個工作坊就係空中飄球~

其實即係教小朋友利用空氣及風力原理，令個汽球係天空飄浮，導師好用心咁同小小豬講解個汽球原理~

之後就再教貼啲紙條係汽球上面，睇下有咩變化~

哈哈哈...其實依個時候個汽球會因為以紙張阻力，會邊轉邊上升呀~

之後老師仲教利用飲管同紙杯再加一粒毛毛球，DIY一個吹簡單儀器令個毛毛球轉動~

係依個工作坊所學到嘅原理相信小小豬都應該唔係太了解，不過佢就好鐘意玩依兩個小玩意，仲話返屋企要用佢嘅毛毛風扇再令個汽球飛上天空呀！

跟住我地就去參加第二個工作坊~

其實都係一啲視覺空間嘅小遊戲~

小朋友可以自己親手做一個視覺空間嘅盒子~

完成有得睇啦~

嚟到最後一個科學工作坊~

其實依個就係講解磁力慨念活動，導師教緊小小豬同極相抗嘅原理~

我地仲利用磁力令毛毛條升起呀~

之後導師哥哥仲表演左一個磁力魔術，就係較剪吸萬字夾啦~

其實原來依個亦都係一個科學原理，將一粒磁石係較剪上不停磨擦，咁較剪上嘅分子就會有所改變，就可以做到依個效果~

最後一個步驟就係小朋友利用磁石及萬字夾，做一個魚缸，等啲魚仔游游游呀~

之後我地就去玩一個小小豬極度期待嘅節目，就係去學魔術啦~

今次魔術師教小朋友做一個變走錢錢嘅魔術~

小小豬好專心咁睇魔術師教學哦~

經過五分鐘訓練，大部分小朋友都學識左，魔術師就搵兩位小朋友出去表演。估唔到小小豬咁主動舉手，仲俾魔術師邀請出去表演添~

哈哈哈...只係練左五分鐘，都算係咁啦~

學習左大半日，都係時候俾小小豬放下電，跳下彈彈床先啦~

我地仲去左畫手仔添，依個小太陽係小小豬自已揀呀~

哈哈哈...簡單得嚟都幾靚呀~

係我地臨離開之際，原來科學園嘅金蛋下都有啲小攤位，小小豬當然又要玩返轉啦~

開開心心我地又玩左大半日，真係非常多謝科學園為小小豬安排咁多好嘅節目呀！

嚟緊嘅星期五至日，科學園都會舉行李行齊國際魔法城堡，大家如果有時間的話，都可以入去玩一轉，可以學下科學工作坊之餘，又可以欣賞小齊嘅精彩魔術，真係十個正呀！

 

More Information :
日期：8月7-9日以及14-16日 (星期五-日)
時間：中午12時至6時
地點：科學園12W大樓

Cityline 購票：http://bit.ly/1D0NwyV
優惠門票組合於購票通及通利琴行售票處公開發售。

Website：http://www.hkstp.org/zh-HK/News-Media-Events/Events-Seminars/2015/Vibrant-Science-Academy-Avon-Lee-International-%281%29.aspx
Facebook：https://www.facebook.com/HongKongSciencePark