超失望的比卡超@沙嗲王

21 AUGUST 2015(FRI)

依排其中一樣係FACEBOOK洗版嘅就當然係沙嗲王比卡超，想食好耐嘅我，終於有機會食比卡超落肚啦~

雖然我唔算係比卡超忠實粉絲，不過古靈精怪嘢就最啱我，所以都有少少期待呀~

沙嗲王為左今次同比卡超Crossover都出左好幾款指定食物同飲品~

先嚟叫杯凍飲先，我叫左杯藍桔荔枝梳打配啫喱(全名唔係好記得)~

個樣又真係幾靚，最特別就係上面嗰三塊藍色薄片，開頭以為係攪拌棒，但原來係硬糖嚟，不過味道就.......唔食都唔會好損失。

味道方面，飲落都好香荔枝味，忌廉都好細滑，以特飲嚟講都可以話合格。

好姐妹糖糖嘅比卡超芒果沙冰~

芒果沙冰配合了比卡超的鮮黃色，外表都幾可愛。糖糖話飲落係超多冰，所以飲兩啖就已經飲晒整杯飲品啦！味道方面，一個字『甜』，而且芒果味似是加入芒果糖漿。幸好尾段嘅涼粉粒都幾軟屬，所以都未算係最差。

先嚟一個小食牛油炸雞翼，其實每次嚟都一定食依個，同之前食嘅一樣，都係脆脆地，味道都唔錯~

終於我地嘅主角配上藍咖喱嘅比卡超咖喱豬排飯~

真係好可愛，唔係好捨得整爛佢呀~

不過...一個恐怖嘅糖糖將比卡超變成........好慘呀~

黑色嘅部分就係由黑糯米做成，只另比卡超的眼鼻口是用紙印出嚟，我諗都係唔食得啦。

係比卡超個正中位置切下，我搵左好耐都搵唔到啲豬扒，終於俾我搵到六粒細細嘅豬扒粒(我之前見朋友仔介紹係原塊豬扒嚟呀)，而且仲要係非常乾身同好韌呀。個黃薑飯都唔係好得，因為真係超硬。整個飯唯一我覺得幾好就係個藍咖喱，甜甜地但又唔算太辣~

滿心期望去匯一匯比卡超，點知就失望而回。其實係唔係因為係旺角依關係，所以質素差啲呢？不過唔深研了，應該唔會有下次啦！

自家製天然保濕MASK工房@彩豐行

21 AUGUST 2015(FRI)

今日應彩豐行邀請，參加自家製天然保濕MASK工房，學做保濕及美白嘅DIY MASK呀~

其實整個過程同我上次整DIY面霜程序都係差唔多(按此重溫)呀~

有左上次經驗，我已經唔再雞手鴨腳，所以都好快上手，一邊跟導師指示一邊自己整~

哈哈哈...又嚟有做實驗嘅心情，其實都幾好玩呀~

同上次有點唔同，就係今次加入嘅係紅景天亮白精華，可以令到個mask有美白及保濕效果，同時使用後亦會加速血液循環，肌膚除咗亮白外，臉色仲會好紅潤~

最後一個步驟就係不停攪拌5分鐘，待原來嘅乳白色水狀嘅原材料混合物變成透明色的凝固Jelly狀~

大功告成了啦~

整完當然要即場試下，個質感有少少似蘆薈GEL，亦都冇任何香味，而且個感覺又好似幾潤哦~

依一瓶分量可以使用兩次，因為沒有添加防腐劑，放進雪櫃冷藏的話可儲存大概一週左右。

自家制DIY產品其實我都好鐘意，自己一手一腳整埋，都幾有滿足感呀！

 

More information :
Website：http://www.choi-fung.com/
Facebook：https://www.facebook.com/choifunghong.hk

 

 

雪糕藝術@Tokyo Secret

21 AUGUST 2015(FRI)

依排見到好多朋友仔都去食好靚又特別嘅雪糕，所以趁今日小小豬要去尖沙咀上興趣班，放學後我地兩母子就拍拖去試下啦~

門口佈置得咁七彩繽紛，所以都好易就見到啦~

店鋪內既有雪糕又有特飲，每款都好吸引呀~

我地都考慮左好耐，都唔知食咩好，最後就決定兩母子每人買一杯，咁就可以試晒兩款皇牌啦！

心急豬又嚟等食啦~

小小豬嘅冬之富士山~

一見到姐姐拎出嘅時候，小小豬就已經不停"嘩嘩聲"，因為依杯底層裡放入左乾冰，所以會不停釋出霧氣，真係好夢幻...超靚呀。

牛乳雪糕再配上法國藍莓醬，味道都唔錯，雪糕有好香濃奶味，甜度都覺得剛剛好。但由於啲雪糕都好快溶，所以都要急急食先得呀。不過有得食雪糕對小小豬嚟講都一定佢問題，佢仲食得不知幾滋味呀~

我嘅森之樹林出場啦~

棉花糖上有少少桑莓爆炸糖及杏仁碎片作點綴，然後罩係抹茶雪糕上，睇賣相都已經非常吸引。坦白講，初時都有啲唔知點入口好，好在店鋪都關住到依一點，係棉花糖同雪糕中間加一個小膠墊，咁食嘅時候就唔洗咁狼狽~

棉花糖一向都係我嘅至愛，所以對我嚟講都一定係好食。不過連埋爆炸糖一齊食，又真係幾特別，就連小小豬都好有興趣呀~

食完棉花糖就到抹茶雪糕，依次嘅抹茶的味又真係俾左我一個小驚喜，整個雪糕都好滑身之餘，味道濃郁得嚟又完全唔會覺得有苦澀味，而且又不會太甜，最好就係雪糕唔會太快溶，可以慢慢食呀~

最底仲有數粒年輪蛋糕，連同雪糕一齊食，又係另一重味覺享受呀~

食完依兩杯雪糕之後，小小豬都已經急不及待話下星期放學後要再嚟。咁都好.....等佢有啲做乖乖動力，下次上堂乖先再嚟過啦！

櫻花寒天啫喱

20 AUGUST 2015(THU)

今日嘅心情都唔係咁好，真係咩都唔想做咁，所以我晚飯後就閉關入廚房整左一輪，我嘅最新傑作 - 櫻花寒天啫喱...靚唔靚呢~

其實我都係睇富澤商店個FACEBOOK見到依個甜品，見到佢地嘅相又真係覺得好靚，剛好屋企之前又買左啲材料，當然即刻心思思去整下啦~

預先將鹽漬櫻花開水浸泡，替換清水浸泡幾次去鹽。我大約都大半個鐘，中途換左三次水~

一包原裝嘅寒天啫喱粉內有兩小包，我今次都只係用左一包呀~

預備600cc熱水~

倒入一包125克既寒天啫喱粉~

為左方便攪勻，所以我分左三次加入啫喱粉，攪到啫喱粉完全溶解就得啦~

之後將啫喱水倒入模具中~

可以再將櫻花放入~

可以利用牙簽慢慢推開花瓣，以做成散開嘅效果，會靚啲呀~

然後放入雪櫃雪大約三小時~

登登登登....先嚟小杯子嘅櫻花寒天啫喱，可能寒天性質都比較彈彈，所以輕輕一推就好易甩模呀~

另一個我就攪攪陴一下，再用個櫻花模嚟印埋個櫻花樣~

其實成個過程都好簡單，只係印櫻花圖案時要留心啲，唔好印爛個櫻花嘛。好在我都算印得唔錯，個櫻花樣都幾出呀~

哈哈哈...唔係自己讚自己，真係整得幾靚，我都唔捨得食呀~

第一次用寒天整甜品，感覺上又比蒟蒻甜品多一點彈彈，比啫哩又冇咁實的的，口感都唔錯呀！

另外，原來我買依款櫻花係可以食，所以我都有食埋，個味道甜甜地又咸咸地(可能我唔夠啲鹽出嚟)，都幾得意呀！