【明目清肺熱】竹蔗茅根杞子無花果茶

23 MARCH 2022(WED)

基本上我都成日煲竹蔗茅根俾小小豬飲，尤其係依段時間都真係煲得好密，因為有助清肺熱，養好個肺就唔怕中招嘛！

我平日都比較多加埋冰糖一齊煲嘅(甜甜地小小豬飲得仲稱心)，不過尋日我去買材料時，店主姨姨就教我改用杞子同無花果去煲，既可以護眼之外，用無花果就總比用冰糖嗰啲調味來得更健康。

既然姨姨教路就當然要試試，所以就嚟一個竹蔗茅根杞子無花果茶俾小小豬飲啦~

竹蔗兩條、茅根兩紮、馬蹄十粒、紅蘿蔔一條、粟米一條、杞子一湯匙、無花果五粒~

買竹蔗時店員都會幫忙一支破開幾段，回家後洗淨之後可以再破開一半，咁煲出嚟就會更加出味~

茅根洗淨瀝乾~

馬蹄洗淨去皮~

杞子及無花果浸洗一陣~

紅蘿蔔去皮洗淨切塊；粟米洗淨切段~

煲內放約3L水，然後隨水加入材料~

待滾起後，繼續用大火加蓋煲約15分鐘~

然後轉慢火加蓋煲多45分鐘~

熄火後再焗多15分鐘~

好飲又有益嘅竹蔗茅根馬蹄水飲得啦~

我初頭都怕冇左冰糖就會唔甜(少啲甜味依個小小豬都會投訴呀)，但入口就有淡淡嘅清甜味，係比冰糖好飲好多，估唔到無花果同竹蔗茅根又幾夾，所以嚟緊我都轉依個煲俾麻煩嘅小小豬飲啦！

以下係各食材嘅功效，可以參考一下呀(網上資料)：
竹蔗 - 清熱潤燥、生津解渴。
茅根 - 清熱利尿、涼血止血。
馬蹄 - 可清熱生津、涼血解毒，還可舒肝明目、利氣通化。
紅蘿蔔 - 有助護眼明目、健脾消食，同埋化痰解毒及提高免疫力。
粟米 - 健脾和胃，利水通尿，益肺寧心。
杞子 - 明目滋腎、潤肺補肝。
無花果 - 清熱生津、健脾開胃及解毒消腫。

溫馨提示：
– 由於個別人仕體質不同，所以大家記得煲之前了解下自己，如有疑問，請先向註冊中醫查詢！