【清熱潤肺】青紅蘿蔔馬蹄蓮子百合湯

7 MARCH 2022(MON)

早幾日係FB湯水群組見到有朋友仔分享左一個防肺炎菌嘅湯水，見睇啲材料都係啲性質平和嘅普通材料，係依家日日宅在定唔知煮咩嘅情況下，咁就跟風試煲下，等兩位老細換下新口味啦~

紅蘿蔔兩條、青蘿蔔一條、馬蹄約八粒、栗子半磅、蓮子一両、百合一両、紅棗十粒、陳皮一角、薑兩片~ 

青紅蘿蔔去皮切塊~

馬蹄去皮~

栗子清洗乾淨~

薑去皮拍鬆~

陳皮浸至軟身，然後刮去囊~ 

紅棗洗乾淨後去核。其實在一個好簡單方法就可以去核，就係用先拎住一粒棗，然後將筷子由頂部開始，慢慢用少少力咁穿過去，就可以好輕鬆咁去核啦~

小心檢查蓮子，因為有部分仍然有中間的黑芯，需要除去那條黑芯先可以煮食，如果唔係整煲湯就會變苦啦~

紅棗、蓮子及百合浸洗一陣~ 

煲內放約2.5L水，然後加入陳皮~

待滾起時，就可以加入所有材料~

待再次滾起後，繼續用大火加蓋煲約15分鐘~

之後轉慢火加蓋煲多1.5小時~

最後加鹽調味，就可以飲得啦~

碗湯係唔係真係可以防肺炎就唔知，不過入口就真係好甜，佢地兩父子仲每人仲飲左三大碗，以行動表示有幾好飲，而且啲湯料又可以做個餸，真係十個正呀.....哈哈哈！

以下係各食材嘅功效，可以參考一下呀(網上資料)： 

紅蘿蔔 – 就有助健脾消食，同埋化痰解毒。
青蘿蔔 – 健胃消食、止咳化痰、清熱解毒，還能增強機體免疫力。
馬蹄 – 可清熱生津、涼血解毒，還可舒肝明目、利氣通化。
栗子 – 有助健脾胃、增進食慾，改善腸道健康及增強扺抗力。
蓮子 – 有益心健脾，補腎及安神之效。
百合 – 有助養肺止咳、寧心安神，適合乾咳、捱夜、壓力大、失眠，及心煩氣躁人士，還可美容養顏。
紅棗 – 具有補脾和胃、益氣生津、養血安神之功效。
薑 – 抗發炎、祛寒強免疫。 

溫馨提示：
- 由於個別人仕體質不同，所以大家記得煲之前了解下自己，如有疑問，請先向註冊中醫查詢！