【親子聖誕Staycation】嘉湖暖笠笠聖誕家庭樂體驗

27-28 NOVEMBER 2021(SAT-SUN)

話說為左等小小豬收心養性準備呈二考試，所以我地都閉關左好一陣子(都係嗰句啦....閉關唔代表我地狂谷佢溫書，只係想佢留係屋企心情平靜啲，唔好玩創晒個心啫)。

考完試就當然要玩個痛快，我地就應邀嚟到嘉湖海逸酒店率先體驗聖誕限定『暖笠笠聖誕家庭樂住宿計劃』，嚟過一個親子STAYCATION，等我地三口子齊齊嚟輕輕鬆鬆下啦~

CHECK-IN完就緊係上房間放好行李先去玩，點知當小小豬一打房門，佢就即刻嘩嘩聲，因為我地今次UPGRADE左入住標準套房呀(註:需另加$400)~

房間空間感真係好大，而且仲有飯檯、書檯同小型廚房，小家具仲好齊全，所以一入嚟都感覺好舒服~

小小豬話最鐘意就係佢個窗邊都晒大，最啱佢坐係度睇風景，夠晒RELAX~

佢兩父子又嚟啦...企定定係度談心，冇我嘅事...我都係去瞓陣先啦...哈哈~

係房間休息一陣之後，我地就向三樓活動室出發，因為要去跟Ken叔叔學整聖誕朱古力布朗尼蛋糕。

係做個蛋糕底時，我都俾小小豬自己去整，始終佢都係大個仔，又有整蛋糕嘅少少經驗，再加上Ken叔叔又教得好詳細，場內嘅職員姐姐又會不時出手幫忙檢查進度，所以小小豬都好似有板有眼，所以個蛋糕都好順利完成~

佢仲學識左原來MIX BROWNIE同普通蛋糕係有少少分別，要用Z字形手去攪拌，咁出嚟個口感先好味呀~

係焗緊個BROWNIE嘅時間，我就用翻糖嚟整雪人做裝飾~

老實講，一向零藝術天份嘅小小豬對依啲手作仔嘅嘢都真係唔係好得。不過，佢都好努力咁去試，加上Ken叔叔又鼓勵小小豬話：雪人唔洗同佢整到一樣嘅，最緊要係自己滿意，對自己嘅作品要有信心。

所以係慢工出細貨嘅情況下，小小豬個雪人都叫做見得下人，係變左一個怪手雪人啫...哈哈~

BROWNIE焗好，裝飾又整好，所以就可以嚟大結合啦~

小小豬嘅聖誕朱古力布朗尼蛋糕整體上都做得OK啦~

入埋落去個聖誕包裝盒，咁就可以拎返上房慢慢食(我夜晚都用左嚟做宵夜，都真係幾好食呀)~

做完靜態少少嘅活動，咁就到左各位小朋友都好期待嘅節目，就轉戰兒童遊戲基地大放電一個鐘啦！

儲左咁耐嘅能量，依個小小豬仲唔想要爆發，佢一見到場內嗰兩個大型充氣彈床，佢都忍唔住要係上面狂跳、狂彈、狂瀡滑梯~

依款充氣彈床小小豬話帶有啲障礙賽感覺，所以玩得特別刺激同攰(文弱書生又嚟啦....跳多幾下就話攰，不過佢就玩得好ENJOY)~

遊戲基地另一邊就有足球機同氣墊球機，小小豬見狀仲唔即刻心心眼~

當然依個時候又到佢兩父子親子好時光，到DADDY出動陪玩嘅時候。每局都鹿死誰手，唔認輸嘅小小豬當然就繼續不停跳戰，所以佢地都唔知玩左幾多次氣墊球，最終都係打和...呵呵呵~

平日都比較少玩足球機，所以對小小豬嚟講都係一件新鮮玩意，咁佢又捉住DADDY不停研究。本以為大有經驗嘅DADDY實會勝出，點知究然玩五局都係小小豬全勝，所以都真係唔可以睇少佢(當然佢都係好彩居多..呵呵呵)~

場內仲有迷你版保齡球添~

開心放完電之後，我地就先返回房間休息一陣，之後就到酒店餐廳食豐富嘅自助餐晚餐~

今次主題係「環球美食自助餐」，食物種類都有好多，對我嚟講主打就一定係冰鎮海鮮盤，有肥嘟嘟嘅生蠔、龍蝦、長腳蟹，我都食左好多轉啦~

今次仲有刺生~

熱葷種類都好多，我個人就最鐘意嗰酥皮帶子湯、羊脾同埋黑松露黃金蝦。而小小豬就大讚個龍蝦伊麵同鮑汁鳳爪好好食~

玩左成日又大放電完，唔止小小豬，就連我地都胃中大開，來來回回食唔停。尤其係小小豬，好少見佢食得咁多，而且依家大個仔識照顧我，好多時都係佢去幫我拎食物添~

又嚟整杯即沖檸檬茶俾我，不過下次可唔可以少甜呀~

當然就唔少得甜品時間，佢嘅種類都算多，而且味道甜度都啱啱好，所以食多幾件都唔會好有罪惡感呢~

仲有聖誕樹頭朱古力蛋糕，好配合聖誕氣氛哦~

依度都只係我地甜品嘅一部分，之後都掛住食唔記得影相，我個人強烈推介即焗嘅朱古力心太軟，值得排隊等佢出爐呀~

最後就緊係要食返杯雪糕嚟個完美總結啦~

自助晚餐係需要另行收費，住客可以有85折優惠呀~

係完全大放電兼食得飽飽情況下，大家都瞓得特別熟睡，我直頭就係打破紀念，十一點就已經瞓左，真係冇咁多雜念影響下，生理時鐘都正常啲。

舒舒服服瞓醒覺之後，我地就去嘆返個自助早餐~

食飽飽返房間休息一陣，佢兩父子就去酒店對面嘅單車徑踏返轉單車(因為我地係摺合單車，長時間都放左係車入面，所以想幾時踏都得...哈哈)~

話咁快就過左兩日一夜渡假之旅，間唔中嚟一個小渡假都真係唔錯(最重要係放下電腦手機嚟一個真假期)，簡簡單單咁叉叉電都係一見嘗心悅目嘅事，玩完人都輕鬆啲壓力都少啲呀！ 

More information :
「暖笠笠聖誕家庭樂住宿計劃」港幣$650起 (2成人 + 1小童)

 • 豪華客房住宿一晚
• 紐約紐約國際美食任點任食早餐2位成人及1位小童
• 聖誕朱古力布朗尼製作班(一堂)
• 聖誕特備室內兒童遊戲基地任玩1小時(超大型充氣遊戲，迷你球類遊戲：足球機、桌上氣墊球及保齡球)
• 免費使用健身室及戶外遊樂場
• 額外每位小童需另加港幣$250及加一服務費 (已包括任點任食早餐、聖誕朱古力布朗尼製作班(1堂)及室內兒童遊戲基地任玩1小時)
• 布朗尼製作班及遊戲基地每日有3節至6節時間可供選擇，每節最多安排8個家庭參加。

Website預訂：https://bit.ly/3p8xMVn

Facebook：https://www.facebook.com/HarbourPlazaResortCityHK/