【消暑之選】冬瓜消暑袪濕茶

19 JULY 2020(SUN)

天氣真係攪到人好悶熱，經相熟藥材店主姐姐推介，所以就嚟煲返個既可以利水袪濕、消除暑氣，同埋健脾固腎嘅冬瓜消暑袪濕茶啦！

其實唔係夏天先需要消暑袪濕，我地依家成日躲係冷氣房內，又食雪糕、生冷食物或凍飲，咁都會令身體積聚濕寒，所以都需要袪下體內濕氣，等我地冇咁易攰呀~

冬瓜皮30g、燈芯草3g、淮山18g、茨實18g、茯苓24g、白朮17g、炒南豆34g、生薏米20g、熟薏米12g、陳皮一角、蜜棗兩粒、灰皮冬瓜一斤及冰糖適量

將所有藥材浸洗一陣~

今次我就用左灰冬瓜，因為灰冬瓜更加可以消暑祛濕，連皮一齊煲仲更加清甜。灰冬瓜表面嗰層白色粉並唔係發霉，係個瓜老身嘅象徵，係好嘢嚟呀~

冬瓜洗乾淨皮上白色粉之後，去除瓜瓤及瓜籽，然後切件~

陳皮浸軟後刮瓤~

煲內放約2L水，然後隨水加入陳皮~

待滾起後，加入所有材料~

繼續用大火加蓋煲約15分鐘~

之後轉慢火加蓋煲1小時~

最後因應個人口味加入冰糖再煲多15分鐘~

隔渣之後就飲得啦~

以下係各食材嘅功效，可以參考一下呀(網上資料)： 

冬瓜皮 - 有治療水腫脹滿，小便不利，暑熱口渴等功效。 

燈芯草 - 具有清心降火的功效，能夠利水通淋。 

淮山 - 有益氣養陰，補脾肺腎，對脾胃虛弱、倦怠無力、食欲不振、肺氣虛燥有好大治療作用。 

茨實 - 有補脾化濕、益腎固精功效。 

茯苓 - 利水滲濕、利尿，可改善記憶力，還有幫助鎮靜的功效。 

炒南豆 -  健脾化濕、消暑袪水腫。 

白朮 - 補氣健脾、燥濕利水、強壯身體及增強免疫力。 

生薏米 - 利水滲濕的功效最為顯著，可以去濕除風、清熱排膿。 

熟薏米 - 健脾益胃，利腸胃，治脾虛泄瀉。 

陳皮 - 有通氣健脾，消滯健胃的功能。 

蜜棗 - 止咳潤肺、化痰平喘功效。 

灰皮冬瓜 - 有清熱、除煩止渴、利尿消腫、除痰、袪濕等多種功效。 

溫馨提示： 

- 孕婦忌服。

- 由於個別人仕體質不同，所以大家記得煲之前了解下自己，如有疑問，請先向註冊中醫查詢！