【清熱養陰】花旗蔘石斛麥冬瘦肉湯

26 MARCH 2020(THU)

依排小小豬都食多左熱氣嘢係時要清心火，所以今次就用花旗蔘、石斛同埋麥冬嚟煲靚湯，等我家兩位老細既可以清熱除煩之外，仲可以補氣養陰，同埋抗疲勞舒壓~

花旗蔘半両、石斛一両、海底椰半両、麥冬半両、百合一両、淮山一両、南北杏一湯匙、無花果兩粒、椰棗兩粒及瘦肉約$40~

花旗蔘略洗後，用廚紙印乾水份~

其他材料浸洗一陣~

瘦肉洗淨汆水~

煲內放入2.5L水，然後加入所有材料(花旗蔘除外)~

待水滾後，繼續用大火加蓋煲15分鐘~

然後轉慢火加蓋煲多1.5小時~

加入花旗蔘後再用慢火加蓋煲多30分鐘~

最後加少少鹽調味，就可以飲得啦~

之前比較少煲花旗蔘就係因為兩位老細都唔太好花旗蔘嗰一陣濃味，今次就聽左朋友仔教路以後下方式嚟煲，就有維持個功效之餘個味又唔重。

所以....今次係有史以來煲花旗蔘湯佢兩父子飲得最暢快，小小豬仲飲左三大碗添！

以下係各食材嘅功效，可以參考一下呀(網上資料)： 

花旗蔘 - 含豐富人蔘皂甘，有強化心臟，益氣提神作用。 

石斛 - 能補五藏虛勞，有明目護眼功效。 

百合 - 能夠解毒、安神、治療咳嗽失眠，對女性來說還能夠很好的抗衰老。 

淮山 - 健脾開胃，其他好處為治療久泄久痢、肺氣虛燥、及消渴尿頻等症。 

麥冬 - 有助養陰生津，潤肺清心。 

海底椰 - 有助清燥熱、止咳、滋陰補腎。 

南北杏 - 可止咳下氣，潤燥消積。 

無花果 - 潤肺止咳、清熱潤腸。 

椰棗 - 天然有豐富纖維和營養，可補中益氣、止咳潤肺、補血等。 

溫馨提示：

- 由於個別人仕體質不同，所以大家記得煲之前了解下自己，如有疑問，請先向註冊中醫查詢！