【增強免疫力】蟲草花姬松茸螺片排骨湯

14 MARCH 2020(SAT)

屋企仲有一份蟲草花同姬松茸，咁依兩類食材都係超啱依家嘅情況飲嘅，所以就當然唔洗諗，加埋螺片、栗子、紅蘿蔔同埋粟米，快快手煲依個好飲得嚟又有益氣健脾，最重要係有助增強免疫力嘅靚湯啦~

蟲草花一両、姬松茸半両、螺片三片、栗子約十四粒、紅蘿蔔一條、粟米一條、陳皮一角、椰棗四粒及排骨約$50~

螺片先浸至軟身~

蟲草花及姬松茸淨後浸至軟身，然後瀝乾水份(一定要瀝乾所有水份先可以放入煲，如果唔係啖湯會有苦味呀)~

椰棗及栗子浸洗一陣~

陳皮浸至軟身，然後刮囊~

紅蘿蔔去皮切塊，粟米洗淨切段~

排骨洗淨汆水~

煲內放約3L水，然後隨水加入陳皮~

待滾起後，加入所有材料~

繼續用大火加蓋煲約15分鐘~

之後轉慢火加蓋煲多1.5小時~

最後加鹽調味，就可以飲得啦~

以下係各食材嘅功效，可以參考一下呀(網上資料)： 

蟲草花 - 滋肺補腎護肝、抗氧化、防衰老、抗菌抗炎、鎮靜、降血壓、提高機體免疫能力等作用。

姬松茸 - 具健腦、消炎、益腎、降血壓、降膽固醇、降血糖同埋改善肝功能，仲有提高消化和免疫系統功能。

螺片 – 螺片有滋陰補腎及健肝益脾的功效，同時亦有助調理身體及腸胃。 

紅蘿蔔 - 就有助健脾消食，同埋化痰解毒。 

粟米 - 健脾和胃，利水通尿，益肺寧心。 

栗子 - 可養胃健脾，更可益補腎氣。 

陳皮 - 理氣健脾、燥濕化痰。 

椰棗 - 天然有豐富纖維和營養，可補中益氣、止咳潤肺、補血等。 

溫馨提示： 

- 由於個別人仕體質不同，所以大家記得煲之前了解下自己，如有疑問，請先向註冊中醫查詢！