【滋陰潤肺】印度椰子螺頭瑤柱雞腳湯

7 JANUARY 2020(TUE)

去街市入貨時見到雜貨店叔叔返左啲大大粒嘅印度椰子，咁係唔知煲咩湯嘅時候就買返兩粒再加埋小小豬至愛嘅螺頭嚟煲啖，滋陰潤肺嘅靚湯飲下啦~ 

印度椰子2個、乾螺頭6粒、乾瑤柱4粒、雞腳12隻、合掌瓜2個、紅蘿蔔1個、粟米1條、南北杏1湯匙、陳皮1角及椰棗4粒~

乾螺頭就先用清水浸泡過夜，等佢浸至軟身~

乾瑤柱洗乾淨浸半小時，然後摵為絲~ 

陳皮浸軟後刮瓤~ 

印度椰子洗淨切條~

粟米去皮切塊~

合掌瓜去心切開一半~

紅蘿蔔洗淨去皮切件 ~

南北杏及椰棗浸洗一陣~

雞腳洗淨汆水，記得啲腳趾唔好剪，因為一剪左就會係煲湯過程漏左啲雞油出嚟，咁成煲湯就一定會好油淋淋啦~

煲內放3L水，然後加入陳皮~

待水滾後加入所有材料~

待再次水滾後，用大火加蓋煲約15分鐘~

之後轉慢火加蓋煲多2小時~

最後加鹽調味，就可以飲得啦~ 

一有螺頭湯小小豬都起碼飲三大碗，咁啖湯又真係超甜嘅，仲有埋雞腳、合掌瓜、紅蘿蔔...等等，係唔知煮咩嘅時候，依個又好飲又好食嘅湯絕對係救左我呀...哈哈哈！

以下係各食材嘅功效，可以參考一下呀(網上資料)： 

印度椰子 - 有助清燥熱、止咳功效、滋陰補腎、潤肺養顏、強壯身體機能嘅作用。 

乾螺頭 - 有滋陰、補腎、補精、健脾、安神助眠功效。 

乾瑤柱 - 含有豐富的蛋白質是維持免疫機能最重要的營養素，能提高免疫力功能的作用，同時亦有滋陰補腎、和胃調中功能。 

合掌瓜 – 有助清熱潤喉，對有氣管不適咳嗽多痰非常好。 

紅蘿蔔 - 就有助健脾消食，同埋化痰解毒。 

粟米 - 健脾和胃，利水通尿，益肺寧。 

陳皮 - 理氣健脾、燥濕化痰。 

南北杏 - 可止咳下氣，潤燥消積。 

椰棗 - 天然有豐富纖維和營養，可補中益氣、止咳潤肺、補血等。 

溫馨提示：
- 由於個別人仕體質不同，所以大家記得煲之前了解下自己，如有疑問，請先向註冊中醫查詢！