【清熱潤肺】西洋菜瑤柱章魚瘦肉湯

20 DECEMBER 2019(FRI)

話行街市時見到一扎扎好靚嘅西洋菜，即刻心引又嚟食西洋菜，唔知點解總係覺得煲過嘅西洋菜係特別好食，所以就買嚟啖西洋菜湯俾自己飲下(係識當時候係要對自己好嘅)，屋企又有一隻章魚乾，所以就嚟煲一個清熱潤肺嘅西洋菜瑤柱章魚瘦肉湯啦~

西洋菜一斤、乾瑤柱六粒、章魚乾一隻、蜜棗三粒、陳皮一角、南北杏一湯匙及瘦肉$40~

西洋菜先用鹽水浸佢一小時，中途最好換兩次水，因為西洋菜係水種植物，一定要洗乾淨啲呀~

乾瑤柱洗乾淨浸半小時，然後摵為絲~

章魚洗淨切件，然後浸至軟身~

陳皮浸軟刮去皮瓤~

蜜棗及南北杏一齊洗淨~ 

瘦肉汆水~ 

煲內放約3L水，隨水加入陳皮~

待水滾後加入所有材料(西洋菜除外)~

等再次滾起後，先可入一半的西洋菜。一定要大滾先好加人西洋菜，如果唔係煲出嚟嘅湯就帶點甘苦味呀~

再次大滾之後，就可以加入餘下的西洋菜~

繼續用大火加蓋煲約30分鐘~

之後轉慢火加蓋煲多1.5小時~ 

最後加鹽調味，就可以飲得~

以下係各食材嘅功效，可以參考一下呀(網上資料)：  

西洋菜 - 有清熱潤肺、助咽喉炎、氣管炎、肺結核、扁桃腺炎及百日咳等的功效。特別屬於燥熱性的咳嗽，療效更為明顯。 

乾瑤柱 - 含有豐富的蛋白質是維持免疫機能最重要的營養素，能提高免疫力功能的作用。同時亦有滋陰補腎、和胃調中功能。 

章魚乾 - 具有益氣補血及健脾功效，而且含豐富蛋白質。 

陳皮 - 理氣健脾、燥濕化痰。

南北杏 - 可止咳下氣，潤燥消積。 

蜜棗 - 止咳潤肺、化痰平喘功效。


溫馨提示：
- 由於個別人仕體質不同，所以大家記得煲之前了解下自己，如有疑問，請先向註冊中醫查詢！