【鴨仔陪住去玩水】小欖ｘB.Duck夏日沙灘營火會

16 JUNE 2018(SUN)

父親節舅父仔話嚟個特別啲嘅慶祝活動，咁係咁提意去BBQ玩返一個下午。由於要就住係屯門嘅表妹仔，所以就去左小欖燒烤樂園BBQ。

我同小小豬都係貪玩之人，咁就緊係即刻話好，所以同埋公公、姨姨、表姨仲有表妹仔，一行八大一BB嚟。剛好依家開始有得玩水，咁就係未開始BBQ就俾小小豬佢地兩父子入去玩返轉啦~

有得玩依個小小豬就當然係急不及待，快快手入場換好泳衣準備入去玩。望到依個咁靚嘅水上樂園，唔止小小豬，就連我都極度興奮呀~

小小豬見到啲滑梯就已經完全進入超興奮狀態，完全係non-stop咁係場內不停走嚟走去又瀡來瀡去，仲同其他小朋友比賽瀡得遠，極度享受係依個滑水梯當中~

瀡到攰就去水上波波池浸住嚟抖下(真係好識嘆呀...哈哈哈)~

依隻精力超級旺盛嘅豬仔又點會肯乖乖休息，成日話要爭取時間繼續瀡水梯~

佢地兩父子仲好ENJOY咁玩香蕉船，緊係啦...有個Daddy人肉造浪機，想幾大浪就有幾大浪，依個爛玩豬就當然玩到唔肯落船啦~

仲有一個鴨仔池，好多B.Duck一齊游水啦~

爛玩豬就連比較BB級嘅滑水梯都唔放過，不過小朋友就係咁，總之有得玩就係要玩盡佢嘛~

話咁快我地嘅時段就完結，所以就去沖身換衫去BBQ啦~

有得玩依隻懶玩豬就緊係超興奮，佢就開心玩足兩個鐘，我就乾蒸燒賣咁企定定睇佢地兩父子開心快活，真係........唔緊要啦.....盡情咁玩先係小朋友應盡嘅責任嘛！

小欖BBQ就係以自助任食形式，所以想食幾多就拎個碟去食物部拎就可以，肚餓嘅小小豬就當然即刻幫手去拎食物去燒啦~

小小豬今日就全程開左個自動MODE，一見我地冇食物就幫我地去拎~

可能玩水就真係玩到攰，所以依隻豬仔都覺肚餓了，雞翼、腸仔、豬扒密密燒，咁啲食物都好新鮮，醃得又夠味，所以其實唔止小小豬，我地都食左好多呀~

有返能量當然又係去玩嘅時候，燒烤場旁邊有一個小沙灘，所以就帶埋表妹仔去燒烤場出面個石灘玩下~

其實依個VIEW又真係幾正呀~

唔覺唔覺我地都係小欖燒烤玩左六個鐘先走，小小豬就可以話係極度透支，食飽飽又有咁多人陪小小豬就緊係最開心，就咁又過左一個開開心心Family Day！

1.