【兩日一夜小渡假】嘉湖奇趣復活節 家庭繽FUN樂住宿計劃

23-24 MARCH 2019 (SAT-SUN)

仲有半個月先到復活節，不過，依隻懶玩小小豬已經成日提住我放假要帶佢去邊度玩。好啦....我嘅目標都係要小小豬成為一個開心又冇壓力嘅小朋友，放假就緊係要去玩，所以我一定會好好計劃俾一個玩到盡嘅假期。

係我完全未開始計劃活動嘅時候，就先等小小豬嚟一個PRE-復活節活動，三口子應邀嚟嘉湖海逸酒店體驗佢地為復活節推出嘅「嘉湖奇趣復活節 家庭繽FUN樂住宿計劃」，開開心心享受一個小渡假啦~

雖然都唔係第一次嚟入住，不過小小豬都依然係好興奮(而且仲好心急)，係車上不停叫DADDY渣車渣快啲啲，佢要快啲去睇下間酒店房、又想去整CUPCAKE、又話要做車手，當然最重要係佢要JOIN埋好朋友SY哥哥一齊玩。(放心...我地兩個都係安全駕駛者，所以...佢有佢急，我地都仍然係KEEP住正常車速去到目的地呀...哈哈哈)！ 

CHECK-IN之後我地就上房間放好行李，一打開房...我同小小豬都忍唔住即刻尖叫起嚟，因為房間超大。我地今次好幸運可以UPGRADE去最高樓層28樓嘅「Park View Suite」，房間真係好大，一邊係廳，另一個邊睡房，真係有超RELAC嘅感覺~

就連洗手間打通左，勁正呀~

我地就真係可以各有各精彩，DADDY就係睡房邊休息邊睇電視，依排佢都好多嘢做，就俾個機會身心都抖返夠本啦~

我就同小小豬係廳HEA下，望住個窗外真係勁舒服，成個人都即刻輕左(我指心情上...體重我已經放棄左好耐了)~   

每位入住小朋友都有一份神秘復活節小禮物，所以小小豬就帶左小兔返屋企啦~  

我地休息夠就到三樓戶外平台，小小豬要去玩期待左好耐嘅三大戶外放電遊戲啦(每個家庭可以有3張遊戲卷)~ 

 第一時間就係去玩小小豬至愛嘅「我是小車手」(每券玩樂15mins)~

小小豬完全好似賽車手上身咁，渣住部車不停係度玩飄移(不過...我覺得似醉駕多啲哦)，完全進入極速忘我境界呀~

除左有為大個小朋友而設嘅「我是小車手」之外，為左照顧幼小朋友，大會仲加設左一個「幼兒小車手」可以俾五歲以下小朋友玩，咁就每位小朋友都可以開心落場玩返轉啦~  

之後就去玩「巨型充氣滾輪」(每券玩樂10mins)~

依個雖然係玩到好攰，不過小小豬係個滾輪入面都不知幾HIGH，最後仲玩到成個人都滾來滾去，完全係放電首選呀~   

最後就嚟到「彈跳天地」(每券玩樂15mins)~

依隻精力無限嘅豬係入面不停傻跳，其實呢.....究竟佢入面有幾個電，放極都放唔完嘅~

之後我地就變身小廚師，參加「復活小雞杯子蛋糕製作班 」~

依排小小豬都有參與唔同嘅COOKING CLASS，可能接觸得多所以睇落都叫做有版有眼，可以自己跟住廚師哥哥指示一步步咁去整(當然....間中都要工作人員出手啦)。 

先攪碎莎莉蛋糕再加入CREAM CHEESE，搓成一個小雞球，再放入雪櫃雪一陣~

再用打雞蛋、落糖、落麵粉去整個蛋糕底~ 

再將已雪好嘅蛋糕小雞球放入白朱古力漿內~

然後就要為復活小雞裝飾~

明明係有圖俾小朋友跟住整復活小雞，但係依個小小豬偏偏要攪另類，佢話依隻小雞好開心，所以就變左星星眼，另外因為佢好愛身旁嘅親人，所以就變左心心咀。唉....見到都唔知好嬲定好笑，不過佢有又晒理由，所以....算啦，小朋友有創意都係一件好事，睇睇下.....依隻「來自星星的小雞」都唔錯呀~

最後個蛋糕底焗好之後，就可以佈置埋個草地~

小小豬嘅復活小雞CUPCAKE完成啦~

玩左一個下午，開心放完電之後，我地先各自就回房間休息充充電(我指我地大人，兩個小朋友完全唔覺攰)，之後就到酒店餐廳食豐富嘅自助餐晚餐。(註: 自助晚餐需另行收費，每兩個大人就可以有一個小朋友免費進餐或參與住宿計劃可以7折進食自助晚餐)~

今次主題係「味遊地中海自助餐」，所以食物種類都有好多，我私心推介就一定係有肥嘟嘟嘅生蠔、超多膏嘅麵包蟹同埋勁鮮甜松葉蟹腳~

仲有即煮嘅馬賽海鮮湯~

刺身同壽司都好新鮮呀~

熱葷方面嘅川歸蝦湯、黑松露黃金蝦、黑毛豬意大利飯都值得推介呀~

不過論吸引就一定係依個火焰雪山蛋糕，睇住大廚表演時嘅火光，睇到小小豬不停大叫「嘩...點解咁嘅」~

當然唔止火焰雪山蛋糕，仲有好多靚靚甜品食呀~

緊係唔可以少左小小豬至愛雪糕啦~

食得滿足又飽飽之後，我地就分頭行動，男子組就回房間玩小小豬至愛嘅大富翁，我地女子組就去健身房焗桑拿，實行各有各精彩~

小小豬實在太鐘意個窗，所以瞓醒覺之後自動自覺坐係窗邊睇圖書啦~

之後我地就去嘆個豐富嘅自助早餐~

早餐過後，我地再去到三樓兒童室外遊樂場，俾小小豬作最後的放電，然後回房間玩到十二點就CHECK-IN離開了~

話咁快就過左兩日一夜渡假之旅，有得玩小小豬就緊係開心仲玩到唔願走。雖然仍然係香港，不過嚟到酒店就總係有一個渡假嘅心情，間中嚟個小渡假，大小朋友都可以叉叉電，個個人都輕鬆啲呀！

More information：
嘉湖奇趣復活節 - 家庭繽FUN樂住宿計劃 13-14, 19 - 22/04/2019 
三人同行$1,142 (2019年4月14日或 22日入住)
三人同行$1,362 (2019年4月13日或 19-21日入住)

4月7日或之前預訂可享85折早鳥優惠 (名額有限，先到先得) 

優惠：
豪華客房住宿一晚
自助早餐2位成人及1位小童
神秘復活節小禮物(乙份)
復活小雞杯子蛋糕製作班 (一堂)
三項復活節户外活動 (我是小車手、巨型充氣滾輪、彈跳天地)
免費無線上網 

備註：
小童價目只適用於3至11歲之小童
額外一位小童需另加港幣$300 (已包括自助早餐、神秘小禮物(乙份)、復活小雞製作班及特備户外活動) ‧
每間客房最多可額外多加一位小童
以上價格已包含10%服務費及適用之政府稅項 



「味遊地中海自助餐」(18:30 - 21:30​)
星期六 成人$508 小童 $350
星期日 成人$488 小童 $330
**小童免費自助晚餐(2位成人正價，1位小童免費)
**參與住宿計劃可以7折進食自助晚餐

Website： https://www.harbour-plaza.com/resortcity/SpecialOffer-easterfamilyfunrmpkg2019-tc.htm
Facebook：https://www.facebook.com/HarbourPlazaResortCityHK/