【試用分享】Dyson Lightcycle™ 智能枱燈

28 MARCH 2019 (THU)

自小小豬開始變成四眼豬之後，我就更加注意佢眼睛健康，尤其當佢睇圖書同玩桌上遊戲嘅時候，除左要金睛花眼留意佢嘅坐姿之外(隻衰豬一睇/玩得投入興奮就會進入忘我境界，要不停提住佢唔好錫本圖書)，有適當嘅光線都係好重要一環，所以一盞合適嘅枱燈都係唔可以缺少嘅~

唔覺唔覺小小豬已經做左四眼豬一年多，其實....平日小小豬都冇乜玩手機依啲電子產品，就連電視都少睇，當我知道佢有近視時都真係十萬個為什麼兼有點唔順氣。不過視光師話有可能係遺傳，亦有可能係佢太鐘意睇圖書，過份傷神所以影響到啦......唉！

咁其實屋企都有用緊普通嘅座枱燈，不過就因為係普通嘅款式，唔可以因應使用用途去改變光線位置。同時亦都因為小小豬越來越鐘意留係自己嘅專屬地方做佢鐘意嘅事(即係佢自己房間，因為屋企地方唔大關係，小小豬平日做功課係留係客廳嘅小書枱做嘅)，所以我地都好努力搵緊一支更加啱嘅枱燈俾佢放入房間用。

就係依個時候收到Dyson最近推出嘅Dyson Lightcycle™枱燈，真係啱晒呀~

其實呢....一講起Dyson我就只諗起冷暖無葉風扇兼空氣靜化機(哈哈...我到依家都用緊..真係唔錯呀)或者吸塵機，但原來佢地連枱燈都有。睇介紹見咁利害就以為好難，點知老公打開箱之後，佢唔洗三分鐘就砌好左，完全係安裝話咁易呀~

我第一個感覺就係似一個天秤，可以隨意升高降低，將燈光推前推後，而且仲可以360度旋轉，完全係我想搵既慳位又可以方便調教適合光源嘅枱燈呀~

枱燈的就係以路軌滾輪的設計，所以就方便我地調節燈嘅高度及位置~

燈蓋上方就有開關、冷暖光及強弱度控制，以輕觸式控制都好方便。另外具有三個智能模式，分別是自動模式、移動感應模式及日光追蹤模式。開啟自動模式後，智能燈會根據四周環境為用家調校最適合的光暗及色溫~

Dyson Lightcycle有5年保養，而佢嘅熱管技術更可以維持亮度和品質60年。另外有超過1000lux嘅強勁照明，同時具備炫光控制同埋達到低頻閃小於1%，所以眼睛就唔會容易覺得好攰呀~

燈的下方會有一個感應器，以監測環境色溫及光度轉變，而自行調節最合適嘅光度~

仲有一樣利害，就係可以配合Dyson Link應用程式，咁就可以遠距離手動設定燈嘅色溫同亮度，亦可以針對唔同場地色溫光度、個人習慣，而且仲係一個結合追蹤本地日光技術再利用埋GPS定位，咁燈光可以跟住日光時間及光線變化去自動配合番自己生理時鐘~

小小豬一見到Dyson Lightcycle™ 就已經急不及待要擺入自己房間，仲安排好枱燈位置，自動自覺調教好位置同光亮度，之後就乖乖咁睇圖書~

以前因為怕唔夠燈光，所以玩太用神同長時間嘅遊戲都唔太建議入房，依家有左支勁燈之後，小小豬就話唔洗怕，所以無論玩咩活動，佢都會自己入房間預埋好一切，完完全全變左一個宅男了....哈哈哈~

用左都有一段時間，每日都開住Dyson Lightcycle陪住小小豬故事時間，又陪佢玩象棋或大富翁，真的....我自己都覺得眼睛係冇咁攰，所以....有時我剪片時都會入小小豬房，開住支燈嚟整，因為我都要好好保護自己雙眼，我唔想咁快有老花呀.....哈哈哈！

深近視有幾煩我自己知，所以真係唔想小小豬仔都經歷啦，我不求減退近視，只望唔好加深得好快，始終八歲開始就係危險期，希望多方面嘅配合，可以繼續穩定落去啦！



More information：
Website：https://www.dyson.hk/zh-HK/lighting/lightcycle/overview.aspx