【開胃健脾】麥芽谷芽薏米瘦肉湯

11 SEPTEMBER 2018(TUE)

話說小小豬有一段時間胃口都唔係太好，雖然依家都叫做好左好多，但都唔可以鬆懈，所以都繼續煲多啲開胃湯水俾佢飲。今次就聽朋友仔介紹，試下煲依個好啱小朋友用嚟開胃健脾飲嘅麥芽谷芽薏米瘦肉湯啦~

麥芽治食積不消、脘腹脹滿、食欲不振及嘔吐泄瀉；谷芽健脾開胃，和中消食；生熟薏米利水消腫及健脾胃；燈芯花則清心降火、利尿通淋及濕熱黃疸；陳皮理氣健脾，燥濕化痰；無花果潤肺止咳，清熱潤腸。(網上資料)

麥芽半両、谷芽半両、生熟薏米各一湯匙、燈芯花半両、陳皮一角、無花果三粒、瘦肉約$35~

將所有藥材浸洗一陣~

陳皮浸軟刮去皮瓤~

瘦肉汆水~ 

煲內放約2.5L水，然後隨水加入陳皮~

待滾起後，加入所有材料~

先用大火加蓋煲約15分鐘~

再轉慢火加蓋煲多1.5小時~

最後加鹽調味，就可以飲得啦~

其實麥芽、谷芽、燈芯花依啲我都曾經煲過，不過當時就用嚟煲涼茶，小小豬都真係麻麻地鐘意，我估可能因為有一陣麥芽藥材味所以佢唔願意飲。初時我都真係唔多敢煲，好怕煲完小小豬唔飲同時又浪費我嘅心機，不過朋友仔就話加埋豬肉一齊煲係好飲好多，見佢咁強烈推介我先敢去試。

估唔到朋友仔又介紹冇錯，啖湯又真係唔重藥材味，感覺就好似飲緊甜甜嘅豬肉湯咁，所以小小豬都好自願地飲左兩大碗添！

溫馨提示：
- 由於涉及藥材成份，個別人仕體質會有所不同，所以大家記得煲之前了解下自己，如有疑問，請先向註冊中醫查詢！