第七次產檢

3 MAY 2010 (MON)

唔經唔覺又一個月，又係去做產檢嘅時候，又可以見到小小豬啦！

其實次次去產檢嘅時候都好擔心，總係好驚小小豬會有問題，又好擔心唔健康咁成長，總之係就一踏入醫務所就得一個字....驚。

今次就仲有多一個擔心，就係好驚我自己唔夠磅。因為上嗰幾個月基本上我都唔係重好多，又唔係太肥，平均都係一個月重一磅左右。醫生話今次要我重四磅先算合格，所以都真係勁驚，好驚自己又唔合格，令小小豬唔吸收，生長得唔健康。

係一個驚慌心情下上磅，一睇個磅數，真係勁開心，今個月終於都合格，總共重左五磅，即刻放上心頭大石，輕鬆左啲啲。

等左一陣就見醫生，先同醫生講返我今個月個身體狀況，之後就去見照超聲波見小小豬啦！

係超聲波機見到小小豬，佢今個月又大個左，醫生度頭仔、腰仔同腳仔時都係比預產期周數大，其他各方面都生長得好好，叫我唔好擔心。 

聽到醫生咁講真係即刻放心晒，不過我係唔會放鬆，要繼續食多啲有營養嘢，等我下個月個磅數又可以合格之餘，小小豬又可以繼續健康咁生長。