【健脾養胃】木瓜栗子粟米素湯

30 AUGUST 2022(TUE)

剛好係街市見到大大粒嘅木瓜，又係店主姨姨大力推薦下，我就買左嚟，加埋啲栗子、粟米..，咁就嚟一個啱晒大小朋友嘅健脾養胃又可以生津止渴嘅靚素湯啦~

木瓜一個、粟米一條、紅蘿蔔一條、馬蹄約六粒、栗子約半磅、南北杏半両及紅棗六粒~

木瓜去皮去籽,切塊備用。建議用較生或半生熟木瓜嚟煲，同時唔好切得太細，如果唔係煲好之後就冇得當湯料食啦~

馬蹄洗淨去皮~ 

紅棗洗乾淨後去核~

紅蘿蔔去皮切塊，粟米洗淨切段~

栗子清洗乾淨~

去核紅棗及南北杏浸洗一陣~

煲內放約3L水，待滾起後加入所有材料~

繼續用大火加蓋煲約15分鐘~

之後轉慢火加蓋煲多1.5小時~

最後加鹽調味，就可以飲得啦~

本身粟米、紅蘿蔔、馬蹄同埋紅棗都係啲帶甜味食材，加上粒靚木瓜，所以就算唔落肉同蜜棗，啖湯都係好清甜，我家兩位老細都話好飲呀！

以下係各食材嘅功效，可以參考一下呀(網上資料)：
木瓜 - 含有豐富的礦物質、維他命A及C，維他命C幫助鐵質被身體吸收，另外也助消化及排便順暢。
紅蘿蔔 - 就有助健脾消食，同埋化痰解毒。
粟米 - 健脾和胃，利水通尿，益肺寧心。
馬蹄 - 可清熱生津、涼血解毒，還可舒肝明目、利氣通化。
栗子 - 健脾胃、有助增進食慾。
南北杏 - 可止咳下氣，潤燥消積。
紅棗 - 可補益脾胃，養血安神、滋補潤心肺。

溫馨提示：
- 於個別人仕體質不同，所以大家記得煲之前了解下自己，如有疑問，請先向註冊中醫查詢！