【清肝益胃】印度椰子合掌瓜石斛草瘦肉湯

15 NOVEMBER 2022(TUE)

最錫小小豬嘅兩位姨姨嚟食飯兼陪玩，就當然要煲啖靚湯俾佢地飲嚟慰勞佢地。

原本都唔知煲咩湯，當我去藥材店入貨時，店主姨姨就向我介紹依個石斛草湯包，既可以清肝益胃，而且可以清熱滋陰又潤肺。聽落又好似幾啱依家天氣飲，所以就買返份材料，再加印度椰子同埋合掌瓜嚟煲靚湯啦~

印度椰子一個、合掌瓜兩個、石斛草半両、天冬半両、白芍半両、沙參半両、玉竹半両、杞子半両、淮山半両、蜜棗兩粒及瘦肉約$50~

印度椰子洗淨切條，睇落好似有點硬，但其實好容易就切到片啦~

合掌瓜去皮去心然而切塊。其實以煲湯計，合掌瓜連皮一齊煲係比較有益啲，不過因為細妹們都鐘意當湯料食，所以我就去左皮先煲，咁食嘅時候就可以方便啲~

其他藥材就浸洗一陣~

瘦肉汆水備用~

煲內放約3L水，待滾起後就可以加入所有材料~ 

待再次滾起後，先用大火加蓋煲約15分鐘~

然後轉慢火加蓋煲1.5小時~

最後加少少鹽調味就可以飲得啦~

第一次煲石斛草其實都有丁點擔心唔知係咩味，不過好在煲好啖湯都係清甜嘅，而且又有印度椰子嘅淡淡椰香味，所以大家都話好飲，話咁快就同我清晒成煲湯啦！

以下係各食材嘅功效，可以參考一下呀(網上資料)：
印度椰子 - 有助清燥熱、止咳功效、滋陰補腎、潤肺養顏的功效。
合掌瓜 - 能疏肝止咳，祛風解熱，健脾開胃。
石斛草 - 滋陰清熱、益胃生津。
天冬 -養陰潤燥，清肺降火，滋補肺腎，清熱除煩。
白芍 - 養血調經，平肝止痛，斂陰止汗。
沙參 - 養陰清肺，益胃生津。玉竹 -養陰潤肺治燥咳，改善乾燥痕癢、補而不膩，不寒不燥，有助滋養脾胃五臟及氣血。
淮山 - 養陰、補脾、肺虛喘咳。
杞子 - 具有補肝腎、益精氣、長肌肉、改善面色、明目安神、祛風治虛、延年益壽、堅筋骨之功效。
蜜棗 - 補益脾胃、潤肺除痰、滋養陰血、養心安神
 

溫馨提示：
- 於個別人仕體質不同，所以大家記得煲之前了解下自己，如有疑問，請先向註冊中醫查詢！