【消炎祛濕】魚腥草竹蔗茅根茶

7 MAY 2022(SAT)

前排成日聽朋友仔講話要煲多啲魚腥草茶，因為魚腥草有抗炎治感冒同解熱功效，飲多啲就唔怕中招，其實我之前都煲過幾次俾小小豬飲(按此重溫)，不過我自已就超寒底，加上相熟中醫師又提過小小豬唔太適合飲得過寒，所以之後我都冇再煲了。

前幾日去買煲湯料時，見到店主姨姨就介紹我依個魚腥草竹蔗茅根茶，既可以消炎祛濕，以乾貨嘅魚腥草為主啱小朋友飲，所以我又執左一份料煲俾小小豬飲啦~

魚腥草一両、竹蔗一両、茅根半両、百合半両、南北杏半両，牛大力半両、粉葛片一両、椰棗五粒、桔餅兩個~

經過處理嘅魚腥草同新鮮好唔同，有啲似樹葉。佢地經過晒乾或者先蒸熟再曬，咁就會冇咁寒涼，比較適合唔同體質嘅人~

先將所有材料浸洗乾淨~

煲內放約2.5L水，然後隨水加入材料~

待滾起後，繼續用大火加蓋煲約15分鐘~

然後轉慢火加蓋煲多45分鐘~

熄火後再焗多15分鐘，然後去渣放溫涼後就飲得啦~

老實講，味道就真係唔算係好好味嗰種，入口帶有少少中國茶嘅感覺，但又唔係難飲嗰隻，只係唔係小小豬嗰杯茶咁啦！

不過，同佢講依家返學中招機會大左，要飲返多啲補補肺消消炎先得，所以佢聽完都會乖乖飲返幾杯嘅。

以下係各食材嘅功效，可以參考一下呀(網上資料)：
魚腥草 - 有助預防感冒及肺熱痰多問題，同時亦清熱解毒、降火、抗炎、消腫排膿、利尿通淋、改善泌尿系統炎症等功效。
竹蔗 - 清熱潤燥、生津解渴。
茅根 - 清熱利尿、涼血止血。
百合 - 有助清肺、潤燥止咳；尤其適合燥熱咳嗽、肺虛久咳及寧心安神。
南北杏 - 有潤肺化痰、止咳定喘、潤燥消積等作用，適用於外感咳嗽、煩熱虛喘、腸燥便秘等症。
牛大力 - 有養腎補虛，強筋活絡，平肝、潤肺之功效。
粉葛片 - 能生津止渴、利水袪濕、清熱除毒、養陰生津，同時有紓緩肌肉與骨骼酸痛、抗衰老、降血壓、降血糖、降血脂之效。
椰棗 - 天然有豐富纖維和營養，可補中益氣、止咳潤肺、補血等。
桔餅 - 有理氣、化痰、止咳功效，含豐富維生素A和C，對風寒咳嗽，氣管敏感，支氣管炎皆有紓緩作用，健胃助消化，潤肺和預防哮喘。 

溫馨提示：
- 雖然乾品經過處理，但女性生理周期時或體質過寒的人都不宜飲用。
- 於個別人仕體質不同，所以大家記得煲之前了解下自己，如有疑問，請先向註冊中醫查詢！