【益智補腦】螺片章魚蓮藕雜豆湯

 9 AUGUST 2021(MON)

話說早幾日去買湯料時，見到店主姨姨介紹佢地新出嘅湯包料，只要簡單買個螺片同蓮藕一齊煲就可以。當然，最吸引我嘅就一定係依個湯有益智補腦同增強抵抗力功效，所以就買份材料煲俾小小豬飲啦~

螺片兩片、青木瓜一個、蓮藕兩節、赤小豆半両、扁豆半両、鷹咀豆半両、眉豆半両、綠豆半両、紅腰豆半両、蓮子半両、圓肉一両、海椰片半両、紅棗六粒、蜜棗三粒、陳皮一角、腰果約半飯碗~

螺片先浸至軟身~

章魚洗淨切件，然後浸至軟身~

青木瓜去皮去核之後切塊~

蓮藕去皮切塊~

陳皮浸軟後刮瓤~

紅棗洗乾淨後去核~

其他食材浸洗一陣~

煲內放約2.5L水，然後加入陳皮~

待滾起時，就可以加入所有材料~

待再次滾起後，繼續用大火加蓋煲約15分鐘~

之後轉慢火加蓋煲多2小時~

最後加鹽調味，就可以飲得啦~

初時都有啲擔心咁多豆類一齊煲，煲好後就一定會有好"杰"，但煲起又冇依個情況，而且啖湯雖然冇落過肉，但都非常甜仲好有濃香豆味，所以兩位老細都大讚好飲呀！

以下係各食材嘅功效，可以參考一下呀(網上資料)

螺片 - 有滋陰補腎及健肝益脾的功效，同時亦有助調理身體及腸胃。
章魚乾 - 具有益氣補血及健脾功效，而且含豐富蛋白質。
青木瓜 - 健脾和胃及增強抵抗力，能保護胃腸黏膜及預防消化道潰瘍。對胃炎、便秘及肺燥咳嗽人士均有益。
蓮藕 - 健脾生肌、化痰止瀉、養胃滋陰。
赤小豆 - 健脾袪濕、利尿消腫。
扁豆 - 有助祛濕健脾胃
鷹咀豆 - 具有潤肺消炎、養顏健胃及解毒之作用。
眉豆 - 能夠起到提高免疫力及理中益氣，補腎健胃、和五臟的功效。
綠豆 - 具有清熱消暑，利尿消腫，潤喉止渴及明目降壓。
紅腰豆 - 助補胃下氣、健脾壯腎、利水的功效。
蓮子 - 補脾益腎，固精澀腸，健腦益智，消除疲勞。
圓肉 - 有滋養補益，補氣血、益智寧心、安神定志的功效，
海椰片 - 滋陰潤肺、除燥清熱及潤肺止咳。
陳皮 - 理氣健脾、燥濕化痰。
紅棗 - 具有補脾和胃、益氣生津、養血安神之功效。
蜜棗 - 補益脾胃、潤肺除痰、滋養陰血、養心安神、
腰果 - 護心補腦及降血糖，亦可令湯更鮮甜濃稠，卻不會像肉湯般油膩。

溫馨提示：
- 由於個別人仕體質不同，所以大家記得煲之前了解下自己，如有疑問，請先向註冊中醫查詢！