【健脾明目】石斛紅蘿蔔豬骨湯

30 JULY 2021(FRI)

早幾日去買藥材店入貨時，當我買石斛時店主姨姨就教我加紅蘿蔔同杞子一齊煲，既可係準備轉天氣嘅時候打好個底，又可以明目護眼嘅功效。

一聽到護眼就緊係即刻心心眼，所以快快手買齊材料煲個靚湯俾小小豬飲啦~

紅蘿蔔一個、石斛一両、淮山一両、杞子半両、蜜棗三粒、豬骨約$50~

石斛、淮山、杞子及蜜棗浸洗一陣~ 

紅蘿蔔去皮切塊~

豬骨洗淨汆水~ 

煲內放約3L水，待煲滾水後加入所有材料~

繼續用大火加蓋煲約15分鐘~

之後轉慢火加蓋煲多1.5小時~

最後加鹽調味，就可以飲得啦~

石斛本身就帶點點甘，但加左紅蘿蔔就可以用甜味蓋過，所以啖湯都係甜甜地易入口。不過，唔計個味道，小小豬一聽到話係護眼佢都會好落力咁飲多幾碗啦...哈哈哈！

以下係各食材嘅功效，可以參考一下呀(網上資料)： 
紅蘿蔔 - 就有助健脾消食，同埋化痰解毒。
石斛 - 功效益胃生津、明目護眼、滋陰清熱及有助補五藏虛勞。
淮山 - 有健脾胃，補益肺氣，滋腎固精。
杞子 - 有滋養強壯及明目功效。
蜜棗 - 止咳潤肺、化痰平喘功效。


溫馨提示： 

- 由於個別人仕體質不同，所以大家記得煲之前了解下自己，如有疑問，請先向註冊中醫查詢！