【健脾潤肺】青木瓜百合蓮子雪耳瘦肉湯

22 MAY 2021(SAT)

今晚奶奶嚟食飯，緊係要煲啖靚湯俾佢飲(間唔中都要扮下乖嘅..哈哈)，咁主角就當然係佢鐘意飲嘅青木瓜，之後我就簡單啲加埋百合、蓮子同雪耳，嚟返一個健脾潤肺又勁滋潤嘅靚湯啦~

青木瓜一個、漳州雪耳半両、沙參半両、玉竹半両、百合一両、蓮子一両、無花果四粒、紅棗十粒及瘦肉約$50~ 

青木瓜去皮去核之後切塊，切嘅時候最好切大件少少，咁煲起之後都可以有得食木瓜呀~

漳州雪耳浸洗後去蒂切細件~ 

紅棗洗乾淨後去核~

其他藥材浸洗一陣~

瘦肉洗淨汆水備用~

煲內放約3L水，待水滾後加入所有材料~

待滾起後，繼續用大火加蓋煲約15分鐘~

之後轉慢火加蓋煲多1.5小時~

最後加鹽調味，就可以飲得啦~ 

簡簡單單又好飲，最重要係小小豬同奶奶都鐘意，加上青木瓜同雪耳又可以當一個餸嚟食，咁我又可以諗少一個餸，所以依個湯絕對係WIN WIN之選呀！

以下係各食材嘅功效，可以參考一下呀(網上資料)：
青木瓜 - 健脾和胃及增強抵抗力，能保護胃腸黏膜及預防消化道潰瘍。對胃炎、便秘及肺燥咳嗽人士均有益。
漳州雪耳 - 有助潤肺、潤膚同養顏嘅功效。
沙參 - 有助養陰清肺及益胃生津。
玉竹 - 則能養陰潤燥，生津止渴。
蓮子 - 有益心健脾，補腎及安神之效。
百合 - 具理脾健胃、利濕消積等功效。
紅棗 - 具有補脾和胃、益氣生津、養血安神之功效。
無花果 - 具有抗發炎、消水腫、促進消化、抗癌、降血壓及降血糖、潤腸通便等功效。 

溫馨提示：
- 由於個別人仕體質不同，所以大家記得煲之前了解下自己，如有疑問，請先向註冊中醫查詢！
- 雖然雪耳係好味又有益，不過都要再提多大家煲過嘅雪耳一定要即日食/飲晒，如果隔夜，經過一夜嘅浸透，佢就會放出一啲有害物，到時就有益變有害啦！