【健脾開胃】茯苓淮山蓮子瘦肉湯

18 OCTOBER 2019(FRI)

依排小小豬胃口又嚟麻麻，原本就打算煲啲山渣水等佢酸酸地開胃一下。不過，係我去買材料嘅時做候，店主叔叔就話山渣唔係人人受得，如果係脾胃弱嘅冇幫助之餘仲傷胃。

之後，店主叔叔仲教我煲依個有助健脾開胃嘅茯苓淮山蓮子瘦肉湯啦~

茯苓26g、淮山26g、蓮子26g、茨實15g、白朮6g、雞內金6g、炒麥芽15g、炒穀芽15g、生薑三片、蜜棗兩粒、瘦肉約$50~

蜜棗及藥材浸洗一陣~

瘦肉洗淨汆水~

薑切片拍鬆~

煲內放約3L水，然後隨水加入薑片~

待滾起後，就可以加入所有材料~

繼續用大火加蓋煲約15分鐘~

之後轉慢火加蓋煲多1.5小時~ 

最後加少少鹽調味，就可以飲得啦~

見到咁多藥材，其實都有丁點擔心小小豬唔肯飲，但原來啖湯入口甜甜地，一啲都唔似藥材湯，所以佢地兩父子都密密飲，小小豬仲叫煲多幾次添。

哈哈哈....佢肯飲又對依隻排骨豬好嘅，我當然好樂意煲多幾次啦！

以下係各食材嘅功效，可以參考一下呀(網上資料)  

茯苓 - 利水化飲、健脾化痰、寧心安神的功效。 

淮山 - 健脾開胃，其他好處為治療久泄久痢、肺氣虛燥、及消渴尿頻等症。 

蓮子 - 補脾止瀉、益腎澀精、養心安神。  

茨實 - 有補脾祛濕、益腎固精。 

白朮 - 補氣健脾、燥濕利水、強壯身體及增強免疫力。

雞內金 - 健胃消食、化積排石。

炒麥芽 - 行氣消食、健脾開胃。  

炒穀芽 - 消食化積、健脾開胃、下氣和中。 

蜜棗 - 止咳潤肺、化痰平喘功效。 

溫馨提示：
- 由於個別人仕體質不同，所以大家記得煲之前了解下自己，如有疑問，請先向註冊中醫查詢！