【哈囉喂由朝玩到晚】海洋公園全園祭

4 OCTOBER 2019(FRI)

一年一度嘅哈囉喂又開始，有得玩就緊係要快快腳嚟玩一轉，所以當海洋公園全園祭正式開始嘅時做，我地就約埋小小豬兩位至愛嘅姨姨嚟由朝玩到晚啦~

一入到園小小豬已經急不及待，第一時間就向「LINE FRIENDS糖果礦場」出發，目的就當然同負責哥哥姐姐玩遊戲攞糖糖~

糖果礦場周圍都有好多佈置，不過心急豬就當然唔識得停底欣賞，佢一心都只係為去拎糖糖...哈哈哈~

每次同CHECK POINT哥哥姐姐玩完遊戲，學講咒語就可以有糖糖。除左糖糖之外仲有磁石貼同杯墊，而且哥哥姐姐們對小朋友都好鬆手，所以小小豬收獲好豐富呢~

之後就去「LINE FRIENDS糖果夢工場」玩兩個小遊戲同影靚相。

今次終於就啱時間睇到「LINE FRIENDS哈囉喂糖果豐收祭」，仲同左BROWN同CONY集郵添。

好友提我一定要睇「地獄巨星賀台慶」，完全冇介紹錯，攪笑再加埋每幕嘅精彩表演，最重要係佢個主題超貼地，大家一定要入場慢慢細味當中情節及對白。 

原本都打算入鬼屋，但係…最終一刻都真係唔多夠膽入(都怪我之前睇晒啲傳媒介紹，見到入面嘅像真度真係太似….驚驚呀)。不過我地都有入其中一間鬼屋「UV 戰陣」，正確嚟講佢都唔算係鬼屋，係一個激光槍戰，小小豬玩得仲叻過我。

另一個推介就一定係夜晚嘅「戌時冥府出閘」大巡遊，一眾嘩鬼好落力咁跳住表演，加埋佢地嘅裝扮又好神似，小小豬仲睇都有啲驚添~