【熊本親子之旅】特色農家蒸籠料理

3 APRIL 2018(TUE)

日本我地又嚟啦......今次我地應JAグループ熊本同埋農協観光嘅邀請，體驗熊本春季農物活動。四日三夜嘅旅程令我同小小豬對熊本都有新嘅感受，就得我開始同大家分享我地嘅遊記啦！ 

一切就由我地開開心心準備上機開始~

小小豬七歲仔先嚟搭第三次，不過次數多少都唔重要，最重要係佢享受去玩嘅過程。係飛機上睇圖書，又有佢嘅好朋友陪，話咁快就渡過左一程飛機時間~

大約四個鐘左右，我地就到左福岡上空啦~

我地到左福岡之後，就轉搭新幹線，向熊本出發~

哈哈...第一次搭新幹線，緊係要留個紀念先得~

大約35分鐘嘅車程，我地就去到熊本站，一到達就見到好大個部長，心情真係好興奮呀~

首先就去我地第一晚酒店放底行李，休息一下先~

日本酒店(尤其係市區)一向都唔會大，但我地今次入住嘅又唔錯哦，夠放三張床都唔會太迫迫咁~

不過我最驚喜就係個浴室，好有家的感覺呀...哈哈哈~

房間望出去景都OK，夠開揚呀~

休息過後，我地行經步行街去我地今晚晚餐地方~

今晚就係去依間農家餐廳 しのじの，食依個特色蒸籠料理啦~ 

餐廳嘅佈置都好有特式~

當然食材都一樣好重要，餐廳嘅肉類和蔬菜都係來自當地農場，而而仲係新鮮直送至餐廳，所以好新鮮呀~

好啦...行左成日，又係時候開餐了，先嚟兩份精美嘅前菜~

再嚟一杯部長特飲~

其實一邊行一邊都諗特色蒸籠料理其實係乜東東，原來就係將肉類同蔬果放係蒸籠入面蒸熟~

肉類就有黑毛和牛「和王」牛肩肉，「龍膽豬肉」嘅肩肉同腩肉。啲肉類真係好新鮮，睇見黑毛和牛「和王」嘅油花好均勻咁散佈，真係好吸引呀~

蔬菜就係早上新鮮收割嘅，我都係第一次食蒸蔬菜，睇見咁新鮮都真係好期待呢~

蒸籠料理都需要大約20-25分鐘，我地都好心急呢~

為免小朋友太肚餓，所以佢地都有一份豐富嘅兒童餐~

小小豬話個兒童餐好好食，尤其係個和牛漢堡，轉眼就俾佢KO晒~

正當睇見小小豬食得津津有味時，我地嘅蒸籠料理都已經食得啦~

估唔到蒸過嘅蔬菜都依然好翠綠哦~

肉類都唔會乾乾的呢~

蒸過後嘅豬肉食起嚟肉質依然軟身，而且仲帶有少少彈牙，好有鮮味呀~

和牛就交俾老公品嘗，佢話好滑身，有入口即溶嘅感覺，而且少少腥味都冇。就連有份食嘅小小豬都話一啲都唔韌呀~

估唔到蒸蔬菜係咁鮮甜，平日唔多願食菜嘅小小豬都自動自覺夾嚟食呀~

除左食物好味之外，餐廳都醬汁都有好要求，有好幾款唔同嘅味道俾我地選擇~

最後就嚟一個熊本米飯同麵線~

再加多一個雪糕甜品~

第一次食農家蒸籠料理，估唔到又幾有驚喜，原來只要有新鮮嘅食材，用最簡單嘅煮食方法，都一樣鮮甜好味，真係好令人回味呢！

食左一個超級好味嘅晚餐，我地就慢慢行返酒店休息，迎接我地第二天嘅旅程啦！

More Information：
農家餐廳 しのじの
地址：熊本市中央区下通1丁目10番3号 銀座プレイスKUMAMOTO8階
電話：096-356-1029
Website：http://shinojino.jp/